SAGRE DE GLESIE MARI DI ROME

Antifone di jentrade Ap. 21, 2

E o ài viodût la sitât sante, la gnove Gjerusalem ch’e vignive-jú dal cil, d’indulà ch’al è Diu, ben mitude come une nuvice pronte pal so nuviç!

Oremus: Preìn: O Pari, che tu ti preparis il templi de to glorie cun pieris vivis e sielzudis, mande il to Sant Spirit su la Glesie par ch'al cressi il popul dai credents ch'al costituirà la gnove Gjerusalem.
Tal domandin pal nestri Signor Gjesù Crist, to Fi, ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture: - Ten vierts i tiei voi su cheste cjase.

Dal prin libri dai Rès 8, 22-23. 27-30
In che volte Salomon si è metût denant dal altar dal Signor, in face di dute la samblèe di Israel e cu lis mans alçadis al cil al à dite: «Signor, Diu di Israel, no’nd’è nissun Diu come te, ne lassú tai cî ne cajú in tjere. Tù tu sês di peraule e di boncûr cui tiei servidors ch’a marcin di cur denant de to face. Ma èsal propit vêr che Diu al vîf chenti? Po, i cî e i cî dai cî no rivin a tignîti dentri e mancul ancjemò cheste cjase ch’o ti ài fate.
Sint la prejere dal to servidor e la so invocazion, Signor Diu gno; scolte l’ancure de domande che il to servidor ué ti presente. Ten vierts i tiei voi dì e gnot su cheste cjase, sul lûc che tu âs dit: Il gno Non al sarà lì.
Scolte il to servidor che ti prèe in chest lûc, scolte l’invocazion dal to servidor e di Israel to popul, cuan’che ti prearan chenti. Scoltiju d’indulà che tu sês, dal cil; scolte e perdone.».
Peraule di Diu.

Tal timp di Pasche si lèi cheste
Prime leture: - Ve’ chi la tende di Diu cui umign.

Dal libri de Apocalisse di Zuan apuestul 21, 1-5a
Jo Zuan o ài viodût un cil gnûf e une tjere gnove, parceche il cil e la tjere di prime a jerin sparîts e il mar nol ere plui. E o ài viodût la sitât sante, la gnove Gjerusalem ch’e vignive-jú dal cil, d’indulà ch’al è Diu, ben mitude come une nuvice pronte pal so nuviç.
Alore o ài sintût une vôs ch’e diseve dal trono: «Ve’ chi la tende di Diu cui umign e lui al vignarà a stâ cun lôr, e lôr a saran il so popul e lui al sarà il "Diu-cun-lôr".
Lui ur suarà lis lagrimis dai lor ceis; la muart no sarà plui, ni corot, ni laments, ni dolor, parceche il vecjo mont nol è plui».
Alore chel sentât sul trono al à dit: «Ve’, che jo o torni a fâ gnûf il mont».
Peraule di Diu. Disin grassie a Diu!

Salmo cul Responsori Sal. 94/95, 1-7

R. Anin cun ligrie te ciase dal Signor! (R.: 1)

1 Vegnît a bati lis mans al Signor,
fasin fieste a la crete che nus salve!

2 Presentinsi denant di Lui ringrasianlu,
fasin fieste sunant e cjantant!

3 Parceche il Signor al è un Diu grant,
il paron di ducj i dius:

4 al à in man lis fondis de tjere,
e a son sôs lis spicis des monts;

5 il mar al è so, parceche lu à fat Lui,
e ancje la tjere, fate des sos mans.

6 Vegnît a inchinâsi devant di Lui,
a butâsi in genoglon denant dal Signor che nus à creâts!

7 Parceche al è Lui il nestri Diu
e nô o sin il popul che lui al mene a passon,
lis pioris ch'al rêç cu lis sos mans.

Seconde leture: - Lassaisi doprâ par tirâ-sú une cjase spiritual.

De prime letare di Pieri apuestul 2,4-9
Miei cjars, fasèjsi dongje di Crist, crete vivent, butade di bande dai umign, ma sielte e preseade denant di Diu, e ancje vualtris, sicu pieris ch’a vivin, lassàjsi doprâ par tirâ-sù une cjase spiritual par jessi predis sants, cul fin di fâ sacrificis spirituai ch’a plasin a Diu, midiant di Gjesù Crist.
Parchel si lèi te Scriture: "Viodèit ch’o met-jú in Sion une piere come cu va, un cjantonâl, che vâl unevore e chel che si fide di jê nol restarà scuajât".
Onor duncje par vualtris ch’o crodèis; ma par chêi che no crodin la piere che le àn butade di bande i muradors, e jè deventade il cjantonâl, un clap ch’al fâs inçopedâ e une crete che inderede";
lôr a sbatin cuintri, parceche no crodin ‘e peraule: lôr e àn chel distin.
Impen vualtris o seis "une gjernassie sielte, predis di çocje di rès, int sante, popul cuistât par laudâ" chel che us à tirâts-fur dal scur tal spetacul de so lus.
Peraule di Díu.

Aleluja Ez. 37, 27

Aleluja. Vè, mo, ch'al è rivât il timp:
che i vers adoratôrs e adoraràn Diu in spirt e veretât. Aleluja.

Vanseli: - Uéve jè stade salvade cheste ciase.

Dal Vanseli seont Zuan 4, 19-24
In che volte: 19 La femine j dîs: «Sior, o viôt che tu sês un profete. 20 I nestris paris e àn adorât su cheste mont, e vualtris o disèis ch’al è a Gjerusalem il puest dulà che si à di adorâ».
21 Gjesù j dîs: «Cròdimi, femine, ch’e jè vignude l’ore che no adorarèis il Pari ni su chest mont ni a Gjerusalem. 22 Vualtris o adoràis ce che no cognosseis, nô o adorìn ce ch’o cognossin, parceche la salvece e ven dai Gjudeos. 23 Ma cumò e jè vignude l’ore che i vêrs adoratôrs e adoraràn il Pari in spirt e in veretât, parceche il Pari al cîr adoratôrs di chê fate. 24 Diu al è spirt, e al covente che i adoratôrs lu adorin in spirt e in veretât».
Peraule dal Signor. La Laut a ti, o Crist!

Su lis ufiertis

Signor, vê agrât il sacrifici ch’o ti ufrin, e al popul che ti pree fâs che i sacraments a prodûsin la gracie de salvece e in plui dà compiment ae lor sperance.
Tal domandin par Crist, nestri Signor. Amen.

Prefassi

†. Il Signor cun vualtris. R. E ancje cun te.
†. I nestris curs adalt. R. Ju vin arcâts pal Signor.
†. Ringrassiin il Signor nestri Diu. R. Al è just e al va ben.

Al è just, al va ben e al conven, ringrassiâti te simpri e dapardut, Signor, Pari sant, Diu onipotent eterno, midiant di Crìst, nestri Signor.
Tù tu nus âs dât la gjonde di podê fâti-sú tal mieç des nestris cjasis la to cjase, d’indulà che tu colmis di plasès la to int in chest mont e tu nus fasis la gracie di stâ dutune cun te.
In chest lûc sant, Pari, tu nus tiris-sú tan’ch’o fossin une glesie vive e dutune tu fasis cressi tan’ch’a fos cuarp dal Signor dute la to glesie sparniçade tal mont, par ch’e rivi a madressi sicu la sante Gjerusalem dal cil.
E nô, dutune cui agnui, te to glesie ti cjantin l’ino di laude.

Sant, sant, sant, al è il Signor, Diu di dut il mont.
I cî e la tjare a' son plens incolms de to glorie.
Osana adalt tai cî!
Benedet sèjal cui ch'al ven tal non dal Signor,
Osana adalt tai cî!

Antifone di Cumunion l’ Cor. 3, 16-17

O seis templi di Diu e il Spirt di Diu al è in vualtris come a cjase sô;
il templi di Diu al è sant, e o saressis propit vualtris.

Dopo de Cumunion

Signor, risultive des benedizions, indalegre e contente la to int, par che la sagre che ué o fasin participant ai tiei sacraments, nus zovi par podê jentrâ là che tu sês in glorie.
Tal domandin par Crist, nestri Signor. Amen.