3 di Avost

SAN SCJEFIN
Santul de diocesi di Concuardie - Pordenon

Antífone di jentrade Sal. 118, 23. 86 e 23

I potents si metin a cjacarâ cuintri di me:
i superbos mi preparin busis:
judimi, Signor Diu gno,
jo o pensarai istes ai tiei ordins.

Oremus: Preìn: Signor, danus la gracie di meti in pratiche ce ch’o stin laudant, par ch’o imparìn a olê ben ancje ai nimîs, parceche o fasìn la fieste di chel ch’al à savût preâ ancje par chêi che lu copavin.
Tal domandin pal nestri Signor Gjesù Crist, to Fi ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture

Dal libri dai Fats dai apuestui 6, 8-10 . 7, 54-60
In che volte Scjefin plen di gracie e di fuarce, al faseve miracui e segnos di chêi grancj in mieç dal popul. Alore un groput di chêi de sinagoghe, che j disevin dai Libars, di cireneos, di alessandrins e di altris de Cilicie e de Asie, si fasin indenant a discuti cun Scjefin, ma no rivavin e fâ cuintri ‘e sapiense e al Spirt ch’al veve cuant ch’al fevelave. Sintinlu ur vignive-sú la rabie e a crustavin i dincj cuintri di lui.
Ma Scjefin, incolmât di Spirtu Sant, al cjalâ il cîl, al viodè la glorie di Diu e Gjesù in pins a la so gjestre e al disè: «Ve ch’o viôt il cîl spalancât e il fi dal om in pins a la gjestre di Diu».
Alore, berlant a dute vôs e stropansi lis orêlis, ducj insieme si son butâts cuintri di lui; a sburtons lu àn parât-fûr de sitât e lu àn claponât.
1 testemonis e àn pojâts i lor vistîts dapîs di un zovin ch’al veve non Saul, e intant che lu clapadavin, Scjefin al preave e al diseve: «Signor Gjesù, racuèj la me anime».
Colât in genoglon, a fuart al à dit: «Signor, no sta fàur colpe di chest pecjât».
Apene dit cussì s’indurmidí-vie.
Peraule di Diu. Ringrassiin Diu.

Salmo cul Responsori Sal. 30, 3cd-4. 6ab e 7b e 8a. 17 e 21ab

R. Signor, o met la me vite tes tos mans. (R.: 6)

Slungje la to orêle e anin svelt in gno jutori.
Devente par me come une crete che mi pare,
come une fuartece dulà ch’o soi sigûr.

O met la me vite tes tos mans;
vuardile, Signor, Diu di peraule.
Jo mi fidi dal Signor.
Il to boncûr al è la me gjonde e la me ligrie.

Mostre buine muse al to servidor,
salvimi, parceche tu sês bon di cûr.
Tu mi platis daûr de to muse
lontan des tristeriis dai umign.

Aleluja Fats 7, 56

Aleluja. O viôt il cîl spalancât
e il fi dal om in pins a la gjestre di Diu. Aleluja.

Vanseli
Us mandi profetis, int di cjâf e mestris.

Dal Vanseli seont Mateo 23,34-39
Alore: Gjesù al diseve ai scrituriscj e ai fariseos: jo us mandi profetis, int di cjâf e mestris. O’n’ coparèis, o’n’ metarèis in crôs e o’n flagjielareis tes vuestris sinagoghis e o’n’ perseguitarèis di sitât in sitât, par che us vegni intor dut il sanc just spandût su la tjere, dal sanc di Abel il just fint al sanc di ‘Sacarie di Barachie ch’o veis copât jenfri il templi e l’altar. Us al garantìs jo: al capitarà dut sore cheste gjarnassie.
Gjerusalem, Gjerusalem, che tu copis i profetis e che tu claponis chêi che ti son mandâts, ce tantis voltis ch’o ài olût tirâ dongje i tiei fîs, propit cemût che une clocje e tire dongje i siei poleçùts sot lis alis, e vualtris no veis olût! Cussì si us lasse vuèide la vuestre cjase.
Propit us al dîs: no mi viodarèis di chi indenant fin che no disarèis: benedet chel ch’al ven tal non dal Signor.
Peraule dal Signor. La Laut a ti, o Crist!

Su lis ufiertis

Signor, vê agrât lis ufiertis di cheste fieste di ué ch’o fasín in onor di san Scjefin martar; e come che lui, par chel ch’al à patît, al à vude la glorie, cussì a noaltris, pe nestre devozion, che nus vegni dome ben.
Tal domandin par Crist, nestri Signor. Amen.

Prefassi

Al è just, al va ben e al conven ringrassiâti te simpri e dapardut, Signor, Pari sant, Diu onipotent, eterno.
Il sanc che il martar Scjefin al à spandût a glorie dal to Non e daûr l’esempli di Crist, nus sburte a crodi tal jutori de to gracie par mantegni la fede e vê il coragjo ch’al covente cuant che si crôt di no vêlu.
Parchel cun ducj chêi dal cîl o cjantìn la to laude.

Antifone di Cumunion Faz 7, 56. 59 e 60

O viôt il cîl spalancât e il fi dal om in pins a la gjestre di Diu; Signor Gjesù, racuei la me anime, e no sta fàur colpe di chest pecjât.

Dopo de Cumunion

Signor, ch’a nus zovin i sacraments ch’o vin ricevûts e, pal jutori di san Scjefin martar, ch’a nus vuardin par simpri.
Tal domandin par Crist, nestri Signor. Amen.