LUNIS DI PASCHE

Antifone di jentrade Esodo, 13, 5. 9

Il Signor us à fats ientrâ in tune tiare dulà ch’a spissulin lat e mil;
par che la leç dal Signor e sei simpri su la vuestre bocje, aleluja,

- o ancje
Il Signor al è rissussitât dopo muart, come ch’al veve dite;
gjoldìn e stin legris ducj, parceche lui al regne par simpri. Aleluja.

Oremus: Preìn: O Diu, che tu fasis cressi la to glesie simpri cun int gnove, fâs la gracie ai tiei servidors, ch’a tegnin salt cul lor mût di vivi chel misteri ch’e àn crodût cu la lor fede.
Tal domandin pal nestri Signor Giesù Crist, to Fî ch’al è Diu e al vîf e al regne dutune cun te e cul Spirtu Sant par ducj i secui dai secui. Amen

Prime leture: Diu al à rissussitât Gjesù, e nô o sin chi a contâle.

Dal libri dai Fats dai apuestui 2, 14. 22-32
In che dì di Pentecostis Pieri, in pins dutune cui undis, al cjape la peraule e ur dîs: Umign de Gjudee e ducj vualtris ch’o stais in Gierusalem, chest us sei clar, scoltait ben lis mes peraulis: Gjesù di Nasaret, chest omp, che Diu us al à racomandât cun miracui e segnos fats midiant di lui fra di vualtris, come che lu saveis ducj, chest omp, ch’al è stât molât tes vuestris mans, seont un plan ben precîs de sapiense di Diu, vualtris lu veis gafât e copât inclaudanlu su la crôs midiant di int cence religjon; ma Diu lu à rissussitât, diliberanlu dal malstâ di chelaltri mont, parceche nol ere just ch’al restas tes sos sgrifis.
Davit mo al dîs di lui:
"O ài simpri il Signor devant dai voi,
e la me anime a jè plene di gjonde:
cun lui a gjestre, no mi tocjarà nissun.
Parchel il gno cur al è plen di ligrie,
e la me anime a jè plene di gjonde;
ancje il gno cuarp si cjate sigur;
parceche no tu lassarâs che la me vite a mueri,
e no tu lassarâs che il to ami al vadi a frajdessi sot tiere.
Tu mi mostrarâs la strade de vite,
tu mi incolmarâs di ligrie cu la to presince".
O scugni dîus, fradis, cun rude scletece che il patriarcje Davit al è muart, al è stât sepulît e la so tombe le vin chenti in dì di uè. Ma stant ch’al ere un profete, e savint che Diu j veve dât peraule sacrosante di fâ sentâ sul so trono un dal so sanc, al à olmât ce ch’al veve di vignî e al à fevelât de rissurezion di Crist, che pardabon nol è stât bandonât tes sgrifis de muart e che nol à vût il cuarp fraidessût. Diu al à rissussitât chest Gjesù e ducj nô o sin testemonis.
Peraule dal Signor. A Diu grassie.

Salmo cul Responsori Sal. 15, 1-2a e 5. 7-8. 9-10. 11

R. Ten cont di me, Signor, parceche mi plati daur di te.
o ancje (R.: 1) Aleluia!

Ten cont di me, Signor, parceche mi plati daur di tè.
Jo o dîs al Signor: Tù tu sês, Signor, il gno tesaur,
no’nd’è mior di tè.
Il Signor al è la part de rigjitât che mi tocje, la me tace.
Tù tu âs in man il gno destin.

Benedet sejal il Signor che mi à dât il sintiment,
e ches gnots cuant ch’al à dreçât il gno cur.
O ài simpri il Signor denant dai voi,
cun lui a gjestre, no mi tocjarà nissun.

Parchel il gno cur al è plen di ligrie,
e la me anime e jè plene di gjonde;
ancje il gno cuarp si cjate sigur,
parceche no tu lassarâs che la me vite a mueri,
e che il to sant al frajdessi sot tiare.
Tu mi mostrarâs la strade de vite,
tu mi incolmarâs di ligrie cu la to presince,
tu mi fasarâs content par simpri.

- Aleluja Sal. 117, 24

Aleluja Cheste sornade le à fate il Signor:
gjoldin e fasin fieste. Aleluja.

- Vanseli: - Diseit ai miei fradis ch’a vadin in Galilee: mi viodaran là.

Dal Vanseli seont Mateo. 28, 8-15
In che volte: lis feminis a van-vie de tombe sveltis cun tante pore e gjonde, corínt a puartâ la gnove ai siei dissepui. E ve’ che Gjesù ur va incuintri disint: «Salve!».
Lôr j van dongje, lu cjapin pai pîs e lu adorin.
Alore Gjesù ur dîs: «No stait a vê pore; làit, visàit i miei fradis ch’a vadin in Galilee e lì mi viodaràn».
Intant che lôr a van, ve’ che cualchi vuardie e rive in sitât a contâ ai sorestants dai predis dut ce ch’al ere sucedût.
A fasin consèi cu lis autoritâts di dâ unevore di bêz ai soldâts e di dîur: «Disèit che i siei dissepui a son vignûts di gnot a puartâlu-vie intant che nô o durmivin. S’al ven a savêlu il procurador, lu cujetarìn nô e nissun no us fasarà nuje».
Cjapâts i bêz, chêi e àn fat come che ur vevin insegnât.
E cheste storie si conte fra i gjudeos fint al di di uè.
Peraule dal Signor. La Laut a ti, o Crist.

- No si dis il Credo.
. Su lis ufiartis.

Signor, acete content i regai de to int par ch’a rivin adore di cuistâ la beatitudine eterne, dopo jessi deventâts gnûfs cu la fede tal to Non e cul batisin.

Antifone di Cumunion Rom. 6, 9

Crist ch’al è rissussitât dopo muart, nol mûr plui,
la muart no j comandarà plui, aleluja.

Dopo de Cumunion

Signor, la gracie dal misteri di Pasche ch’a vadi parsore tes nestris animis, par ch’e fâsi degns dai tiei regai chêi che tu ju âs fats jentrâ te strade de salvece eterne.
Tal domandin par Crist nestri Signor. Amen.


REGINA COELI
Regina cæli, lætare, alleluja,
quia quem meruisti portare, alleluja,
resurexit, sicut dixit. alleluja,
Ora pro nobis Deum, alleluja.

Gjolt, Regjine, la plui degne, alleluja,
Chel che tu âs mertât di puartâ, alleluja,
al è risurît, come pometût. Alleluja!
Prèe il Signor par nô. Alleluja!