DOMENIE 29 VIE PAL AN

Antifone di jentrade: Sal. 16, 5-8

Diu gno, ti prèi par che tu mi scoltis:
drece la to orele par scoltâ ce ch’o ti dîs.
Tenmi cont come il neri dai voi,
plàtimi sot des tos alis.

Oremus. Preìn: Diu eterno e onipotent, fâs ch’o vebin simpri di olê chel che ti plâs, par podê servîti cun cur sancîr e cun scletece.
Tal domandìn par Gjesù Crist nestri Signor e to Fi ch’al è Diu e al vîf e al regne dutune cun te e cul Spirt Sant par ducj i secui dai secui. Amen.

An A

Prime leture: O ài dât fuarce ‘e man di Ciro par meti sot di lui ducj i popui.

Dal libri dal profete Isaje 45, 1. 4-6
Il Signor al fevele cussì a Ciro, so "onzût", che j à dât fuarce te man gjestre,
par ch’al meti-sot di sè ducj i popui:
«O dislearai i cinturons dai ombui dai rès,
par che si spalanchin lis puartis denant di lui,
e cussì lis puartis no restaràn sieradis.
Al è par-vie dal gno servidor Jacop, e dal gno parferît Israel,
ch’o ti clami par non,
ch’o ti ài sielt cence che tu mi cognossessis.
Jo o soi il Signor, no’nd’è unaltri compagn di me:
fur di me no’nd’è unaltri diu.
Ti ài amât cence che tu mi cognossessis,
par che si sêpi dal jevâ al lâ amont dal soreli,
che fur di me dut al è nuje.
Jo o soi il Signor,
no’nd’è unaltri compagn di me».
Peraule di Diu. Ringrassiin Diu!

Salmo cul Responsori: Sal. 95, 1 e 3. 4-5. 7-8. 9-10 ac

R. Laudait e faseit onor al Signor. (R: 7)

Cjantàit al Signor un cjant gnûf,
cjantàit al Signor in ducj i cjantons de tjare.
Contàit de so glorie a ducj i popui
contàit lis sos maravèis a dute la int. (R: 7)

Contàit che il Signor al è grant
e ch’al merte laudât,
ch’al è di rispetâ plui di chealtris dius;
contàit che i dius forescj no son bogns di nuje,
invessit il Signor al à fat cîl e tiare. (R: 7)

Laudàit il Signor, popui di ogni fate,
laudàjlu e fasèit onor al Signor.
Laudàit il so Non come ch’al merte,
fasèit ufiertis e jentràit tai siei curtîvs. (R: 7)

Ingenoglàjsi denant dal Signor vistuts di fieste,
trimàit denant di lui ducj vualtris, int di chest mont.
Disèit ai forescj: Il Signor al è il rè;
lui al judiche come cu va i popui. (R: 7)

Seconde leture: O mi ricuardi de vuestre fede, dal vuestri amor di Diu e de vuestre sperance.

De prime letare di Pauli apuestul a chêi di Tessaloniche 1,1-5b
Pauli, Silvano e Timoteo ‘e glesie di chêi di Tessaloniche in Diu Pari e tal Signor Gjesù Crist: gracie e pâs a vualtris.
O ringrassiin simpri il Signor par-vie di vualtris, ricuardànjus tes nestris prejeris, no podínt dismenteâ lis oparis de vuestre fede, e lis vitis dal vuestri amor di Diu e la saldece de vuestre sperance tal Signor nestri Gjesù Crist in face dal nestri Diu e Pari, savint nô ben, fradis tant cjars a Diu, cemût ch’a jè stade la vuestre sjelte, al ven a stai che la nestre predicje dal vanseli no jè stade dome a peraulis, ma ancje cun fats straordenaris e cun Spirtu Sant che us àn convinçûts adimplen.
Peraule di Diu. Ringrassiin Diu!

Aleluja: Fil 2, 15-16

Aleluja. O vèis di semeâ come lampions in tal mont:
tignît alte la peraule di vite. Aleluja.

Vanseli: Dàit al Càisar ce ch’al è dal Càisar e a Diu ce ch’al è di Diu.

Dal Vanseli seont Mateo 22, 15-21
Alore i fariseos si tîrin di bande par fâ consei e viodi cemût ch’a vevin di pescjâlu in peraule.
J mandin i lor dissepui cui erodiàns par dîsj: «Mestri, o savin che tu sês sancîr e che tu insegnis la vìe di Diu come cu va e che no ti impuarte di nissun, parceche no tu cjalis in muse nissun. Duncje dînus: ce ti semêjal? si puèdial pajâ la tasse al Càisar o no?».
Gjesù, cognossude la lor malìcie, ur dîs: «Parcé mi tentàjso, int false? Mostràjmi la monede de tasse».
J preséntin un denar.
E lui: «Di cui êse cheste figure e cheste scrite?».
A j disin: «Dal Càisar».
Alore lui: «Duncje dàit al Càisar ce ch’al è dal Càisar e ce ch’al è di Diu a Diu».
Vanseli dal Signor. La Laut a tì, o Crist!

An B

Prime leture: Cuant che si è parferît tan’che un sacrifici pai pecjâts, al viodarà la so dissendence.

Dal libri dal profete Isaje 53, 10-11
Il Signor al à ulût fruâlu cul patî,
cuant che si è parferît tan-che un sacrifici pai pecjâts.
Poben al viodarà la so dissendense,
i siei dîs a saran slungjâts
e midiant di lui al sucedarà ce ch’al plâs al Signor.
Diliberât dal patî,
al sarà colmât di dut midiant di ce ch’al sa;
il gno servidor iust al fasarà deventâ juscj tancj di lôr,
cjapant-sú i lor pecjâts.
Peraule di Diu. Ringrassiin Diu!

Salmo cul Responsori: Sal. 32, 4-5. 18-19. 20 e 22

R. Signor, che il to boncûr nus cuviergi, come ch'o sperìn.

La peraule dal Signor e jè sclete, 2)
e dut ce ch’al fâs al è come ch’al promet.

j plâs la justissie e ce ch’al va ben,
dute la tjare e jè plene incolme de misericordie dal Signor.

I voi dal Signor a son simpri vierts su chêi ch’a spietin la so gracie,
simpri pront a salvàur la vite, e a tegnîju-sú te miserie.

La nestre anime a spere tal Signor, ch’al è chel che nus jude e che nus pare.
Signor, che il to boncur nus cuviergi, come ch’o sperìn.

Seconde leture: Presentàjsi cun coragjo denant dal trono dal boncur.

De letare ai Ebreos 4,14-16
Fradis: posto ch’o vin un grant-predi ch’al è stât bon di travanâ i cî, Gjesù il Fi di Diu, tignin salde la nestre fede. Parceche no si trate di vê un grant-predi che nol è bon di compatî lis nestris miseriis, ma ùn che lis à provadis dutis, come nô, fur dal pecjât.
Alore, presentìnsi cun coragio denant dal trono de gracie par jessi compatîts e par cjatâ la gracie di jessi judâts tal moment ch’al covente.
Peraule di Diu. Ringrassiin Diu!

Aleluja 2’ Tim. 1, 10

Aleluja. Il nestri Salvador Gjesù Crist al à disfate la muart,
e al à fat lusî la vite midiant dal vanseli. Aleluja.

Vanseli: Il fi dal om al è vegnút par dâ la so vite par tanc’ di lôr.

Dal Vanseli seont Marc 10,35-45
Alore: Jacun e Zuan, fis di ‘Sebedeo, a van dongje di Gjesù par dîsj: «Maestri, o olín che tu nus fâsis ce ch’o ti domandìn».
Ur dîs: «Ce olèjso ch’o us fâsi?».
E lôr j dîsin: «Tu âs di fânus sentâ ùn a gjestre e ùn a çampe te to glorie».
Ma Gjesù ur dîs: «No savèis ce ch’o domandàis: podèjso bevi che tace ch’o bêf jo, o ricèvi chel batîsin ch’o ricêf jo?».
Lôr j dîsin: «Lu podín».
Ma Gjesù ur dîs: «La tace ch’o bêf jo la bevarèis,
il batîsin ch’o ricêf jo lu ricevarèis;
ma sentâsi ‘e me gjestre o a me çampe no soi jo ch’o ài di dâlu;
al è par chêi ch’al è stât preparât».
Chei altris dîs, sintude cheste, e àn scomençât a rabiâsi cuintri Jacun e Zuan.
Gjesù ju clame dongje e ur dîs: «O savèis che i sorestants dai popui ju governin come parons, e i lor grancj ur fâsin pesâ la lor autoritât.
Nol è cussì fra di vualtris, ma cui ch’al ûl deventâ grant fra di vualtris al à di jessi vuestri servidor; e cui ch’al ûl jessi il prin fra di vualtris al à di jessi sot di ducj. Parceche ancje il fi dal om nol è vignút par jessi servît, ma par servî e par dâ la so vite come presit par unevore di lôr».
Vanseli dal Signor. La Laut a tì, o Crist!

An C

Prime leture: Cuant che Mosé al tegnive alçadis lis mans, Israel al vinceve.

Dal libri dal Esodo 17,8-13
In chê volte: a rivàrin chêi di Amalec a bati cuintri Israel a Refidim. Mosé al à dite a Gjosué: «Sielç i umign e va a bati cuintri chêi di Amalec. Jo doman o sarai insom dal çuc, cul baston di Diu in man».
Gjosué al à fat come che i veve dite Mosé e si è metût a bati cuintri chêi di Amalec; e Mosé cun Aron e Hur a son lâts-sú insomp dal çuc.
Cuant che Mosé al tegnive alçadis lis mans al vinceve Israel; al bastave che lis molas-jú un moment par ch’a vincessin chêi di Amalec. Ma lis mans di Mosé a jerin strachis. Alore a jàn cjapât un clap e j al àn metût sot par che si sentàs, e Aron e Hur j tignivin alçadis lis mans ùn par bande. E cussì lis sos mans no si son stracadis fint al lâ amont dal soreli.
E Gjosué al à fat scjampâ chêi di Amalec e dut il lor popul a colps di spade.
Peraule di Diu. Ringrassiin Diu.

Salmo cul Responsori - Salm. 120, 1-2. 3-4. 5-6. 7-8

R. Il jutori mi ven de bande dal Signor,
ch’al à fat cil e tiare. (R.: 2)

O stoi cjalant lis monts:
d’indulà mi vegnarâjal jutori;
Il jutori mi ven de bande dal Signor,
ch’al à fat cil e tjare.

Nol lassarà che tu ti scussis i pîs;
il to vuardian nol durmìs.
No, nol durmìs e nol çugne
il vuardian di Israel.

To vuardiàn al è il Signor,
che ti fâs ombrene su la gjestre:
il soreli no ti fasarà mâl di dì
e nancje la lune di gnot.

Il Signor ti vuardarà di ducj i mâi,
e al tegnarà cont de to vite.
Il Signor ti vuardarà te lade e te tornade,
di chi indenant e par simpri.

Seconde leture: L’om di Diu al à di jessi come ch’al covente, pront par dutis lis oparis buinis.

De seconde letare di Pauli apuestul a Timoteo 3, 14 - 4, 2
Cjar fi: sta salt in ce che tu âs imparât e in ce che ti àn insegnât, savint di cui che tu lu âs imparât e parceche, di frut in sú, tu cognossis lis sacris Scrituris, che ti puedin fâ capî ce ch’al covente par salvâsi midiant de fede in Crist Gjesù.
Dute la Scriture e jè ispirazion di Diu e a zove par insegnâ, par fâ viodi ce che nol va, par dreçâ, par tirâ-sú te justissie, par che l’om di Diu al sèi come ch’al covente, pront par dutis lis oparis buinis.
O ti prèi denant di Diu e di Crist Gjesù, ch’al à di vignî a judicâ i vîs e i muarts, e par-vie dal so pàndisi e dal so regno: predìcje la peraule cence molâ, tant cuant ch’e va, che cuant che no va; cride, sberle, racomande cun dute la passiense e la mior dutrine.
Peraule di Diu. Ringrassiin Diu.

Aleluja - Sal. 129, 5

Aleluja. Ti spieti, Signor; la me anime a spiete la to peraule. Aleluja.

Vanseli: Diu al darà reson ai sièi ch’a lu clamin in jutori.

Dal Vanseli seont Luche 18, 1-8
In chê volte: Gjesù ur contave ancje une parabule, su chê che si scuen preâ simpri e mai stufâsi.
Al diseve: «Tune sitât al ere un judiç cence timor di Diu e cence rispiet di nissun. In che sitât e jere ancje une vedue che jè lade a dîsj: "Dâmi reson ch’o ài cuintri ùn che mi fâs cause".
Par unevore di timp nol à ulût. Ma dopo al à dite fra di sé: Ancje s’o soi cence timor di Diu e no mi scompon par nissun, par-vie che cheste vedue e jè simpri che mi secje, o i fasaràj sentense, par che no vegni simpri a rompimi il cjâf».
E il Signor po al zontà: «O vèis sintût ce ch’al dîs il judiç trist.
E Diu no darâjal reson ai sièi ch’a lu clamin in jutori dì e gnot, ancje se s’intarde a dàure? Us al dîs jo che ur darà la lor reson cun premure.
Ma il fi dal om, cuant ch’al vignarà, cjatarâjal fede su la tjare?».
Vanseli dal Signor. La laude a Ti, o Crist.

Su lis ufiertis

Judinus, Signor, a stâ come cu va denant di te, par che i misteris che nus fasin deventâ dutune cun Crist, nus dèin ancje la fuarce di vivi come cu va.
Tal domandìn par Crist nestri Signor. Amen.

Prefassi

V. Il Signor cun vualtris. R. E ancje cun te.
V. I nestris curs adalt. R. Ju vin arcâts pal Signor.
V. Ringrassiin il Signor nestri Diu. R. Al è just e al va ben.

Al è just, al va ben e al conven, ringrassiâti te simpri e dapardut, Signor, Pari sant, Diu onipotent eterno, midiant di Crìst, nestri Signor.
...
E nô, dutune cui agnui, te to glesie ti cjantìn l’ino di làude.

Sant, sant, sant, al è il Signor, Diu di dut il mont.
I cî e la tjare a son plens incolms de to glorie.
Osana adalt tai cî!
Benedet sèjal cui ch'al ven tal non dal Signor,
Osana adal tai cî!

Antifone di Cumunion Sal. 32, 18-19

1 voi dal Signor a son simpri vierts su chêi ch'a spietin la so gracie,
simpri pront a salvàur la vite e a tignîju-sú te miserie.

o ancje Mc. 10, 44 (gr.)

Il fi dal om al è vignût par dâ la so vite come presit par unevore di lôr.

Dopo de Cumunion

Signor, ti preìn di fânus la gracie che chescj misteris nus zovin tant par vê i bens di chest mont, come par capi chêi di chel altri.
Tal domandìn par Crist nestri Signor. Amen.