1 di Novembar
FIESTE DI DUCJ I SANTS

Antifone di jentrade

Gjoldin ducj insieme tal non dal Signor,
fasìn fieste in onor di ducj i sants;
ancje i agnui a gjoldin de lor fieste,
e ducj insieme a laudin il Fi di Diu.

Oremus: Preìn: Diu onipotent eterno, che tu nus lassis fâ fieste pai merits di ducj i tiei sants in tune sole volte, ti prein di jessi plui larc di cûr cun nô, ch'o vin bisugne, par-vie ch'a son unevore che ti prein.
Tal domandin par Gjesù Crist nestri Signor e to Fi, ch'al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture: Al ere un spetacul di int, che no si podeve contâ.

Dal libri de Apocalisse 7, 2-4. 9-14
Jo, Zuan, o ài viodût un agnul ch'al vignive-sú de bande di jevade. Al veve il stamp dal Diu vivent e a chei cuatri agnui, ch'a vevin il podè di fâ dam a la tiare e al mar, al sberlave ad alte vôs: «No stàit a fâ dam ni 'e tiare, ni al mar, ni al bosc, fintremai che no varìn marcât sul cernèli i servidors dal nestri Diu».
E o ài capît che il numar dai marcâts al ere di cent e corante cuatri mil, di dutis lis tribùs di Israel.
Podopo o ài viodût un spetacul di int che no si podeve contâ, di ogni gjarnassie, tribù e popul e lengàç; ch'a stavin in pins denant dal trono, in face dal Agnel, cul vistît blanc e cu lis ramis di palme in man, ch'a vosàvin a fuart: «Salve al nestri Diu, ch'al è sentât sul trono, e al Agnel».
E ducj i agnui dulintor dal trono, dai viei e dai cuatri vivents, si butin in genoglon cu la muse par tiare denant dal trono par adorâ Diu, disint: «Amen! Laut, glorie, sapiense, grassie, onor, potence e fuarce al nestri Diu par in secula. Amen».
Alore un vieli al cjape la peraule e mi dîs: «Sastu cui ch'a son e dontri ch'a vegnin chêi vistûts a blanc?».
«Signor, j rispuint, tu lu sâs ben tú».
E lui: «A son chêi ch'a vegnin de grande tribulazion e che àn lavât e fat deventâ blancs i lor vistîts tal sanc dal Agnel».
Peraule di Diu. Ringrassiin Diu!.

Salmo cul Responsori Sal. 23, 1-2. 3-4ab. 5-6

R. Cheste e jè la int sielte
ch'a cîr di viodi la to face, Signor. (R.: 6)

La tiare e dut ce ch'e à, e jè dal Signor,
il mont cun dute la int;

parceche al è lui che le à plantade sore i mars
e le à saldade sore i flums.

Cui esal chel ch'al pò lâ su la mont dal Signor,
cui puedjal stâ te so sante cjase?
Chel ch'al à lis mans netis e il cur mont,
chel che nol và daûr de falsetât.

Chest al varà la benedizion di Diu
e ce ch'al è just da part dal Signor, che lu salvarà.
A son cussì chêi ch'a van a cirilu,
chêi ch'a cirin di viodi la muse dal Diu di Jacop.

Seconde leture: O viodarin Diu come ch'al è.

De prime letare di Zuan apuestul. 3, 1-3
Fîs miei un grum cjars: viodèit ce spetacul d'amor che nus à dat il Pari: di jessi clamâts fîs di Diu e di jèssilu pardabon. Se il mont no nus cognos, al è parceche nol à cognossût lui.
Miei cjars, nô cumò o sin fîs di Diu, ma nol è stât pandût ancjemo ce ch'o sarìn. O savìn che cuan'che si pandarà, nô o sarìn sul so stamp, parceche lu viodarìn come ch'al è. Chel ch'al à cheste sperance in lui al cîr di deventâ mont, come ch'al è mont lui.
Peraule di Diu. Ringrassiin Diu!

Aleluja Mt. 11, 28

Aleluja. Vignît cà di me, ducj chêi ch'o seis stracs e masse cjamâts,
e jo us fasarài polsâ. Aleluja.

Vanseli: Stait contents e plens di gjonde, parceche la vuestre pàe a jè grande in cîl.

Dal Vanseli seont Mateo 5,1-12a
Alore: Gjesù, viodude tante int, al va su pe mont; e cuant che si è sentât, j van dongje i siei dissepui.
Al à scomençât a insegnàur cussì:
Furtunâts i puars ta l'anime, parceche il regno dai cî al è lôr.
Furtunâts chêi ch'a vain, parcech'a saràn consolâts.
Furtunâts chêi che sapuartin, parcech'a saràn parons de tiare.
Furtunâts chêi che àn fan e set de justissie, parcech'a saran saceâts.
Furtunâts chêi che àn misericordie, parcech'a cjataràn misericordie.
Furtunâts i monts tal cur, parcech'a viodaràn Diu.
Furtunâts chêi ch'a puartin la pâs, parceche ur disaràn fîs di Diu.
Furtunâts chêi ch'a son perseguitâts par-vie dal just, parceche il regno dai cî al è lôr.
O sareis furtunâts cuant che us insultaràn, us perseguitaràn e, cu la bausie, a disaràn ogni sorte di mal cuintri vualtris par-vie di me. Stait contents e plens di gjonde, parceche la vuestre pàe a jè grande in cîl.
Vanseli dal Signor. La Laut a tì, o Crist!

Su lis ufiertis

Signor, vèi agrât i regài ch'o ti presentin in onor di ducj i sants, e concedinus di viodi ch'a son preocupâts de nestre salvece, chêi ch'o crodín ch'a son zà sigûrs de lôr.
Tal domandin par Crist nestri Signor. Amen.

Prefassi
Al è just, al va ben e al conven ringrassiàti te, simpri e dapardut, Signor, Pari, Diu onipotent e eterno. Ué tu nus dâs la ligrie di fâ fieste pe to sitât, la Gjerusalem di lassú, che jé ancje nestre mari, dulà che une schirie di nestris fradis, ducj insieme, a ti laudin par simpri.
E nô, ch'o sin in viaç par lassú, o slungjìn il pas plens di sperance, contents de siorte tocjade ai nestris fradis, nestris amîs e di bon esempli par nô.
Par chest regal dal to boncur, cu la schirie di ducj i Sants, o cjantìn plens di gjonde la to laude.

Antifone di Cumunion Mt. 5, 8-10

Furtunâts i monts tal cur, parcech'a viodaràn Diu; furtunâts chêi ch'a puartin la pâs, parceche ur disaràn fîs di Diu; furtunâts chêi ch'a son perseguitâts par-vie dal just, parceche il regno di Diu al è lôr.

Dopo de Cumunion

O Pari, ingenoglansi denant di te, che tu ses l'unic ch'al merte cjalât e l'unic sant, o ti domandìn la gracie di passâ di cheste taule, par int in viaç, a chê de patrie dal cîl, deventant sants cun dut il to amor.
Tal domandin par Crist nestri Signor. Amen!