17 di Fevrar
SANTS MARTARS DI CONCUARDIE

Antifone di jentrade

Il sanc dai nestris martars al à bagnade la fonde de nestre fede;
la lor prejere ch'a vuardi il nestri credo.

Oremus: Preìn: Signor, cjale di bon voli cheste int che s'indalegre tal ricuardâ i siei sants martars di Concuardie, e fasij la gracie di jessi salde te fede e di vê simpri il coragjo ch'al covente.
Tal domandìn pal nestri Signor Gjesù Crist, to Fi ch'al è Diu e al vîf e al regne dutune cun tè e cul Spirtu Sant par ducj i secui dai secui. Amen..

Prime leture: O sin pronts a muri, ma no a lâ cuintri lis lez dai vons.

Dal secont libri dai Macabeos 7,1-2.9-14
In ché volte al sucedé che siet fradis, ciapâts dutune cun lor mari. il rè al oleve obleâju, a son di sgoreadis e gnervadis, a mangjâ cjâr proibide di purcit.
Un di lor, fevelant par ducj, al à dite: «Ce uèlistu capî o savê di nô? O sin pronts a murî, ma no a lâ cuintri lis lez dai vons».
[Po il secont, aromai su lis ultimis, al à dite: «Om cence cur, tù tu nus cjolis di chest mont, ma il rè dal mont, s'o murarin pes sos lez, nus tornarà a dâ un'altre vite gnove e par in secula».
Po' a tacârin cul tierç ch'al presentà pront e cun coragjo lenghe e mans apene che j al domandârin e al à dite cun scletece: «Lis ài vudis di Diu, ma a valin mancul che no lis sos lez e o speri che lui al vebi di tornâmes»,
Parfin il rè e la so clape a restârin pal coragjo dal fantat che nol mostrave di vê pore di jessi marturizât.
Muart chel, a tacârin a marturizâ il cuart in te stesse maniere. Ridot pes ultimis, al diseve: «Ce biel ch'al è murî par colpe dai umign, par vê dirit che Diu al puarti a bon fin lis sperancis di jessi rissussitâts di lui; ma par te la rissurezion no sarà par tornâ a vivi».
Peraule di Diu. Ringrassiin Diu.

Salmo cul Responsori Sal. 15, 1-2 e 5a. 9. 11

R. Signor, tù tu âs in man il gno distin.

Ten cont di mè, Signor, parceche mi plati daur di tè.
jo o dîs al Signor: tù tu sês, Signor, il gno tesàur
no'nd'è mior di te.
Il Signor al è la part de rigjitât che mi tocje, la me tace.

Parchel il gno cur al è plen di ligrie,
e la me anime a jè plene di gjonde;
ancje il gno cuarp si cjate sigur.

Tu mi mostrarâs la strade de vite
tu mi incolmarâs di ligrie cu la to presince,
tu mi fasarâs content par simpri.

Seconde leture: Furtunât l'om ch'al sapuarte i pericui.

De letare di Jacun apuestul 1,24. 12
Fradis, crodèjmi ch'al è propit d'indalegrâsi cuant che us tocje di sapuartâ ogni sjorte di provis, parceche o savèis che la vuestre fede ben provade e frute passiense.
E la passiense ch'e fâsi la so vore interie in vualtris, par ch'o puedis deventâ come cu va e a puest cence vê nùje che us mancji.
Furtunât l'om ch'al sapuarte lis provis, parceche se lis vinç al varà la zòe de vite, che il Signor al à prometût a chêi che j vuelin ben.
Peraule di Diu. Ringrassiin Diu

Aleluja Fil. 1, 29

Aleluja. Vualtris o vèis vude la gracie, in non di Crist,
no dome di crodi in lui, ma ancje di patî par lui. Aleluja.

Vanseli: S'e àn perseguitât me, a perseguitaràn ancje vualtris.

Dal Vanseli seont Zuan 15, 18-21
In che volte: Gjesù al à dite ai sièi dissepui: Se il mont us odèe, o vèis di savê che prin di vualtris al à odeât me. S'o fossis dal mont, il mont al amares la so robe; parceche no seis dal mont, ma jo us ài tirâts-fur dal mont, il mont us odèe. Visàjsi di ce che us ài dit: il servidor nol è plui grant dal so paron. Se àn perseguitât me, a perseguitaràn ancje vualtris; se àn metût in pratiche la me peraule, a metaran in pratiche àncje la vuestre. Ma e fasaran dutis chestis robis cuintri di vualtris par-vie dal gno Non, parceche no cognóssin chel che mi à mandât.
Peraule dal Signor. La laude a Ti, o Crist.

Su lis ufiertis

Signor, vê agrât chest pan e chest vin madressûts te tjere dai nestris martars di Concuardie
e torninusai cul savor de to taule dal cil.
Tal domandin par Crist nestri Signor. Amen..

Prefassi

Al è just, al va ben e al conven ringrassiâti tè simpri e dapardut, Signor, Pari sant, Diu onipotent eterno.
Il sanc, che i nestris martars di Concuardie e àn spandût a glorie dal to Non e daûr l'esempli di Crist, nus sburte a crodi tal jutori de to gracie par mantegnî la fede e vê il coragjo ch'al covente cuant che si crôt di no vêlu.
Parchel cun ducj chêi dal cil o cjantin la to laude.

Antifone di Cumunion Lc. 8, 3 5

Il Signor al dîs: Cui ch'al pierdarà la so vite par mè e pal vanseli la salvarà.

Dopo de Cumunion

Signor, che tu nus âs vûts a taule cun tè, fasinus ancje la gracie di crodi cuant ch'al pese, di sperâ cuant ch'al coste, di olê ben cuant che no lu mértin.
Tal domandin par Crist nestri Signor. Amen..