14 di Genar

SAN DURI DI PORDENON

Antifone di jentrade Gen. 12, 1

Lasse la to int, la to parentât e la cjase di to pari
par lâ in chel paîs che ti mostrarà il Signor.

Oremus: Preìn: Signor Gjesù Crist, che tu âs ulût doprâ san Durì di Pordenon, un dai nestris, par ch'al contas il to Vanseli fin jú pe Cine, fasinus, par plasé, la gracie che in Friûl no vebin di dismenteâ la to peraule e che no la pierdin chêi di nô che ur tocje lâ pal mont.
Tal domandin a ti che tu vivis e regnis cul Pari e cul Spirtu Sant par ducj i secui dai secui. Amen.

Prime leture: No fasín inçopedâ nissun, par che il servissi nol sei criticât.

De seconde letare di Pauli apuestul a chêi di Corint 6, 3-10
Fradis: nô no fasin inçopedâ nissun, par che il servissi nol sei criticât; ansit, in dut e pardut, si compuartin come servidors di Diu, cun tante passiense tes tribulazions, tai mo ments critics, cuant che no si sa ce fâ, sot la sgorie, in preson, tes rivoluzions, tes vitis, tes veglis, tal zunâ; cence tristerie, savint, lassant cori, cun bontât, cul Spírtu Sant, cul amor di Diu sclet, cu la peraule di veretât, cu la fuarce di Diu; midiant des armis de justissie tant di gjestre che di çampe, midiant di un bon non e cence un bon non, midiant cjacaris tristis e buinis; tignûts par imbrojons, cuant ch'o sin int di veretât; par forescj cuant ch'o sin ben cognossûts; par int cul pît te buse, cuant ch'o sin cà ch'o vivìn; par int vergade, ma no sin stâts copâts; par int avilide, cuant ch'o sin simpri legris; par pitocs nô ch'o fasin deventâ siors tancj di lôr; par int cence nuje, nô ch'o vin in man dut.
Peraule dal Signor. A Diu grassie.

Salmo cui Responsori Salm. 66, 2-3. 5. 6 e 8

R. Che il Signor al vebi dûl di nô e che nus benedissi. (R.: 2)

Che il Signor al vebi dûl di nô e che nus benedissi,
che nus cjali cun muse legre;
par che chi su la tiare si cognossi la so strade
par che ducj i popui a cognossin la so salvece.

Dute la int che sèi legre e contente
parceche tù tu judichis i popui come cu va;
tù tu drecis come cu va ducj i popui.

Signor, che ti laudin i popui,
che ti disin grassie dutis lis gjernassiis.
Che Diu nus benedissi,
e che lu rispietin ducj fin tal ultin cianton de tiare.

Aleluja Fil. 2, 15-1.6

Aleluia. O vèis di semeâ come lampions in tal mont,
tignint alte la peraule di vite. Aleluja.

Vanseli; Us al garantìs io che noi pierdarà la so pàe.

Dal Vanseli seont Mateo 10,34-42
In che volte Gjesù al à dite ai siei dodis apuestui: No stàit a crodi ch'o sèi vignût a puartâ pâs su la tiare; no soi vignût a puartâ pâs, ma vuere;
parcech'o soi vignût a distacâ il fi dal pari, la fie de mari
e la brût de madone; cussì i nemîs dal om a saran chêi di cjase.
Cui ch'al ûl ben al pari o 'e mari plui che no a mi nol è degn di jessi cun me,
e cui ch'al ûl ben o al fi o 'e fie plui che no a mi nol è degn di jessi cun me;
e cui che nol cjape-sú la crôs e nol ven daurmi nol è degn di jessi cun me.
Cui ch'al ten cont de so vite la pierdarà
e chel che la piert par cause mê la cjatarà.
Cui ch'al acete vualtris al acete mè,
e cui ch'al acete mè al acete chel che mi à mandât.
Cui ch'al acete un profete, parcech'al è profete, al sarà pajât come un profete
e cui ch'al vierç la puarte a un just, parcech'al è just, al cjaparà la pàe dal just.
Cui ch'al darà une sole tace di aghe frescje a un di chei puarins chi, dome parcech'al è gno dissepul, us al garantis jo che nol pierdarà la so pàe.
Vanseli dal Signor. La laut a tì, o Crist.

Su lis ufiertis

Signor, acete chestis ufiertis e cjale di bon voli nô ch'o fasin fieste a san Duri, ch'al à acetade la to clamade.
Tal domandin par Crist nestri Signor. Amen.

Prefassi

Al è just, al va ben e al conven benedîti e ringrassiâti simpri, Diu eterno che dut tu puedis, midiant di Crist nestri Signor. Tù tu fasis il plasé 'e to glesie di fâ fieste par san Durì di Pordenon, tu la tegnis-sú cul so bon esempli, tu j insegnis cu la so dutrine e tu la vuardis cu lis sos prejeris.
Par chest regâl dal to bonolé, dutune cui agnui e cui sants, o cjantin l'ino de to laude.

Antifone di Cumunion l' Cor. 1, 23-24

Nô o predicjìn Crist metût in crôs,
ch'al è fuarce di Diu e savê di Diu.

Dopo de Cumunion

Signor, a Nô ch'o vin gjoldût dal to pan e dal to vin, fasinus la gracie, pai merits di San Durì, che no dismenteín la to peraule.
Tal domandin par Crist nestri Signor. Amen.