SAGRE DE GLESIE MARI DI AQUILÈE
e sagre di dutis lis glesiis dal Friúl

Antifone di jentrade Sal. 67, 36

Signor, dal to templi tu sês trement.
Il Diu di Israel al dà fuarce e coragjo al so popul.
Benedet sèjal Diu!

Oremus: Preìn: Signor, scolte la prejere dal to popul ch’al fâs fieste in gjonde pe sagre di cheste glesie, par che la int, che si cjate adun chenti, a puedi servîti come cu va e vê la gracie de to redensie.
Tal domandin pal nestri Signor Gjesù Crist, to Fi, ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture
Ten vierts i tiei voi su cheste cjase.

Dal prin libri dai Rès 8, 22-23. 27-30
In che volte Salomon si è metût denant dal altar dal Signor, in face di dute la samblèe di Israel e cu lis mans alçadis al cil al à dite: Signor, Diu di Israel, no’nd’è nissun Diu come te, ne lassú tai cî ne cajú in tjare. Tù tu sês di peraule e di boncur cui tiei servidors ch’a marcin di cur denant de to face. Ma èsal propit vêr che Diu al vîf chenti? Po, i cî e i cî dai cî no rivin a tignîti dentri e mancul ancjemò cheste cjase ch’o ti ài fate.
Sint la prejere dal to servidor e la so invocazion, Signor Diu gno; scolte l’ancure de domande che il to servidor ué ti presente. Ten vierts i tiei voi dì e gnot su cheste cjase, sul lûc che tu âs dit: Il gno non al sarà lì.
Scolte il to servidor che ti prèe in chest lûc, scolte l’invocazion dal to servidor e di Israel to popul, cuan’che ti prearan chenti. Scoltiju d’indulà che tu sês, dal cil; scolte e perdone.
Peraule di Diu. Ringrassiin Diu!

Tal timp di Pasche si lèi cheste
Prime leture
Ve’ chi la tende di Diu cui umign.

Dal libri de Apocalisse di Zuan apuestul 21, 1-5a
Jo Zuan o ài viodût un cil gnûf e une tjare gnove, parceche il cil e la tjare di prime a jerin sparîts e il mar nol ere plui. E o ài viodût la sitât sante, la gnove Gjerusalem ch’e vignive-jú dal cil, d’indulà ch’al è Diu, ben mitude come une nuvice pronte pal so nuviç.
Alore o ài sintût une vòs ch’e diseve dal trono: «Ve’ chi la tende di Diu cui umign e lui al vignarà a stâ cun lôr, e lôr a saran il so popul e lui al sarà il "Diu-cun-lôr".
Lui ur suarà lis lagrimis dai lor ceis; la muart no sarà plui, ni corot, ni laments, ni dolor, parceche il vecjo mont nol è plui».
Alore chel sentât sul trono al à dit: «Ve’, che jo o torni a fâ gnûf il mont».
Peraule di Diu. Ringrassiin Diu!

Salmo cul Responsori Sal. 121, 1-2. 3-4a. 4b-5. 8-9

R. Anin cun ligrie te ciase dal Signor! (R.: 1)

Ce ligrie, cuant che mi àn dite:
o lin te cjase dal Signor!
E cumò i nestris pîs a son
sot des tos puartis, Gjerusalem.

Gjerusalem e jè stade ben fate
come une sitât che si plante ben:
dulà che lis tribûs, chês dal Signor, a van su,
daur la leç ch’al à vût Israel,
a laudâ il non dal Signor.

Bramàit la pâs a Gjerusalem:
ch’a sèin cence poris chêi che ti uelin ben!
Dentri des tos muràis ch’e sei pâs,
ch’a vivin cence poris tai tiei palaz!

Par-vie dai miei fradis e dai miei amîs
ti disarài: Ve pâs dentri di te!
Par-vie dal ben ch’o uèi ‘e cjase dal Signor nestri Diu
ti brami dome ben.

Seconde leture
Lassaisi doprâ par tirâ-sú une cjase spiritual.

De prime letare di Pieri apuestul 2,4-9
Miei cjars, fasèjsi dongje di Crist, crete vivent, butade di bande dai umign, ma sielte e preseade denant di Diu, e ancje vualtris, sicu pieris ch’a vivin, lassàjsi doprâ par tirâ-sù une cjase spiritual par jessi predis sants, cul fin di fâ sacrificis spirituai ch’a plasin a Diu, midiant di Gjesù Crist.
Parchel si lèi te Scriture: "Viodèit ch’o met-jú in Sion une piere come cu va, un cjantonâl, che vâl unevore e chel che si fide di jê nol restarà scuajât".
Onor duncje par vualtris ch’o crodèis; ma par chêi che no crodin la piere che le àn butade di bande i muradors, e jè deventade il cjantonâl, un clap ch’al fâs inçopedâ e une crete che inderede"; lôr a sbatin cuintri, parceche no crodin ‘e peraule: lôr e àn chel distin.
Impen vualtris o seis "une gjernassie sielte, predis di çocje di rès, int sante, popul cuistât par laudâ" chel che us à tirâz-fur dal scur tal spetacul de so lus.
Peraule di Diu. Ringrassiin Diu!

Aleluja Ez. 37, 27

Aleluja. Il Signor al à dite: O ài plantade la tende là di vualtris:
o sarai il vuestri Diu e vualtris o sareis il gno popul. Aleluja.

Vanseli
Ué e jè stade salvade cheste ciase.

Dal Vanseli seont Luche 19, 1-10
In che volte: Gjesù, jentrât a Gjeric, al passave-fur pe sitât. E ve’ che un omp, ch’al veve non ‘Sacheo e al ere sorestant di chêi des tassis e sior, al cirive di viodi cui ch’al ere Gjesù, ma nol podeve par colpe ch’e jere masse int e lui al ere píçul.
Alore, corint indenant, al monte-sú par un fiar par viodilu, parceche al veve di passâ par lì.
Apene rivât sul puest, Gjesù al cjale par ajar e j dîs: «’Sacheo, dismonte svelt, parceche ué o scuen fermâmi a cjase tô».
Al dismonte svelt e lu acete plen di gjonde. Ducj, viodint chest, a mormoravin disint: «Al è lât a gustâ là di un pecjador!». Alore ‘Sacheo, metinsi in pins denant dal Signor, j dîs: «Ve’, Signor, ch’o doi ai puars la metât di ce ch’o ài, e s’o ài imbroât cualchidun o j torni cuatri voltis di plui». Gjesù j rispuint: «Ué e jè stade salvade cheste cjase, parceche ancje lui al ere fi di Abram. Tant al è ver che il fi dal omp al è vignût a cirî e a salvâ dut ce ch’al ere pierdût».
Peraule dal Signor. La Laut a tì, o Crist!

Su lis ufiertis

Signor, vê agrât il sacrifici ch’o ti ufrin tal dì de nestre sagre, ch’o fasin par ricuardâ la sornade cuant che tu ti sês indegnât di vegnî a vivi in chest lûc, e fâs di nô une ufierte spiritual ch’a ti plasi.
Tal domandin par Crist, nestri Signor. Amen.

Prefassi

Al è just, al va ben e al conven, ringrassiâti te simpri e dapardut, Signor, Pari sant, Diu onipotent eterno, midiant di Críst, nestri Signor.
Tù tu nus âs dât la gjonde di podê fâti-sú tal mieç des nestris cjasis la to cjase, d’indulà che tu colmis di plasês la to int in chest mont e tu nus fasis la gracie di stâ dutune cun te. In chest lûc sant, Pari, tu nus tiris-sú tan’ch’o fossin une glesie vive e dutune tu fasis cressi tan’ch’a fos cuarp dal Signor dute la to glesie sparnizade tal mont, par ch’e rivi a madressi sicu la sante Gjerusalem dal cil.
E nô, dutune cui agnui, te to glesie ti cjantin l’ino di laude.

Antifone di Cumunion l’ Cor. 3, 16-17

O seis templi di Diu e il Spirt di Diu al è in vualtris come a cjase sô;
il templi di Diu al è sant, e o saressis propit vualtris.

Dopo de Cumunion

Signor, risultive des benedizions, indalegre e contente la to int, par che la sagre che ué o fasin nus zovi pa l’anime e pal cuarp.
Tal domandin par Crist, nestri Signor. Amen.