SESTE DOMENIE VIE PAL AN

Antifone di jentrade Sal. 30,3-4

Slungje la to orele, Signor, e anin svelt in gno jutori.
Devente par me come une crete che mi pare,
come une fuartece dulà ch’o soi sigur,
parceche la me crete e la me fuartece tu sês Tù;
pal to sant Non vuàrdimi e mènimi par man.

Oremus: Preìn: O Diu, che tu dîsis di fermâti bulintîr tun cur onest e sclet, fâs che nô, in gracie tô, o sèin simpri cussì, par che tu puedis indegnâti di vignî a stâ cun nô.
Tal domandin par Gjesù Crist, nestri Signor e to Fi, ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

An A
Prime leture: Alore la to lûs e cricarà come l'albe

Dal libri dal profete Isaje 58, 7-10
Il Signor al dîs cussì:
Divît il to pan cun chel ch’al à fan,
met a sotet i puars che no àn dulà parâsi,
vistìs chel che nol à cun ce taponâsi,
e no sta sierà i voi denant di nissun
ch’al è di cjâr come te.
Alore la to feride si sierarà in presse;
la justissie a cjaminarà denant di te,
e la glorie dal Signor tu le varâs daûr di te.
Alore cuant che tu prearâs,
il Signor ti scoltarà disint: «O soi cà!»
Se no tu dopris plui nissun jôf,
se tu finirâs di comandâ a dêt e di vê tristis idèis,
ma tu darâs di mangjâ al plen di fan
e tu sacearâs il puar par fuarce,
alore la to lûs s'impiarà tal mieç dal scûr,
e tù che tu jeris tal scûr, tu ti cjatarâs in plen misdí.
Peraule di Diu. Ringrassiin Diu.

Salmo cul Responsori: Sal. 111, 4-5. 6-7 8a e 9

R. Lom ch’al à timor di Diu
al è come un lampion impiât tal scûr.

Furtunât l'om ch'al à il timor di Diu,
al è pai bogns un lampion impiât tal scûr.
Furtunât l'om ch’al à dûl e ch’al preste bulintîr
e al fâs i siei afars cun justissie.

Il just nol cloparà mai,
no si lu dismentearà mai plui.
Nol varà pore des cjacaris,
al è plen di coragjo, parceche si fide dal Signor.

Al è salt e cence poris,
al dà ai puars cence misurâ;
nol molarà di jessi larc cun ducj,
al tegnarà alt il cjâf plen di onor.

Seconde leture: Us ài predicjât Crist metût in cros.

De 1^ letare di Pauli apuestul a chêi di Corint 2, 1-5
Fradis: jo, cuant ch’o soi rivât là di vualtris, us ài contât la gnove di Diu cence grancj discors e cence grande siense. Jo o ài crodût ben cun vualtris di no intíndimi di nuje, dome di Gjesù Crist, e ancje chel metût in cros.
E là di vualtris jo mi soi presentât puaret, plen di pore e cun tante tremarole, e il gno fevelâ e lis mes predicjis no jerin di peraulis studiadis par convìncius, ma a cirìvin di fàus viodi il Spirt e la fuarce di Diu, par che la vuestre fede si pojàs no sul savê dai umign, ma su la fuarce di Diu.
Peraule di Diu. Ringrassiin Diu.

Aleluja Zuan 8, 12

Aleluja. Jo o soi la lûs dal mont, dissal il Signor,
cui ch’al ven daùrmi al varà la lûs de vite. Aleluja.

Vanseli: Vualtris o seis la lûs dal mont.

Dal Vanseli seont Mateo 5, 13-16
In che dì Gjesù al à dite ai siei dissepui: Vualtris o sèis il sal de tiare; ma se il sal al piert il so savor cun ce si àjal di salâlu? Nol vâl plui nuje: si lu bute-fûr, par che la int lu pescji.
Vualtris o sèis la lûs dal mont. Une sitât che jè sore une mont no pò platâsi.
No si impìe il lampion par mètilu sot dal miezùt, ma sul cjandelîr par ch’al fâsi lûs a ducj chêi ch’a son in cjase.
Cussì e à di lusî la vuestre lûs denant de int, par che viodi lis vuestris buinis oparis e che laudi il vuestri Pari ch’al è in cîl.
Peraule dal Signor. La Laut a ti, o Crist!


An B
Prime leture: Il lebrôs al à di vivi dibessôl, fur dal campament.

Dal libri Levitic 13, 1-2. 44-46
Il Signor al à dite a Mosé e a Aron:
Chel om che j gambie di color la piel, o che j vegnin-fur bufulis o che devente lusinte cà e là la piel, ch'a son i segnos de lebre, si à di menâlu là di Aron il predi, o ancje là di un cualunche dai siei fîs.
Duncje, chel ch'al à intorsi la lebre e par ordin dal predi al à di vivi dibessôl, al puartarà la tonie a slas, nol metarà nuje sul cjâf, al tegnarà taponade la bocje cun tun peçòt, al visarà ch'al è malât e infetât.
Par dut il timp ch'al restarà lebrôs e infetât al à di vivi dibessôl fur dal campament.
Peraule di Diu. Ringrassiin Diu.

Salmo cul Responsori: Sal. 31,1-2. 5.11

R. Tu sês tu, Signor, che tù mi paris
e che tu mi jemplis de gjonde dai liberâts. (R.: 7)

Furtunât chel ch'al à vude la soluzion dal so pecjât,
ch'al à vût il perdon de so tristerie.
Furtunât chel om, che Diu nol à di metij in cont pecjats,
che nol à tristeriis tal so cur.

Signor, o ricognos di vê pecjât,
no ti plati la me tristerie;
o ai dite: o confessi il gno pecjât al Signor.
E tù tu as perdonât il gno pecjât, la me tristerie.

Il Signor al tapone cul so boncur
chel che si fide di lui.
Stàit legris tal Signor e gjoldèit, int buine,
cjantàit di gjonde, int di buine cussiense.

Seconde leture: Cirît di fâ come me, ch’o ài fat come Crist.

De prime letare di Pauli apuestul a chêi di Corint: 10, 3l; 11,1
Fradis: sèi ch'o mangjàis, sèi ch'o bevèis, sèi ch'o fasèis alcaltri, fasêt dut a glorie di Diu.
No stàit a fâ cjapâ çopedòns ni ai gjudeos, ni ai grecs, ni ‘e glesie di Diu, come me ch’o cîr di contentâ ducj in dut, no cirint ce ch’al va ben par me, ma ce ch’al va ben par tancj di lôr, par che si salvin. Cirît di fâ come me ch’o ài fat come Crist.
Peraule di Diu. Ringrassiin Diu.

Aleluja: Mt. 9, 12-13

Aleluja. Chêi ch'a stan ben no àn dibisugne dal miedi;
ur covente a di chêi ch'a stan mal, dissal il Signor;
jo o soi vignût a clamâ i pecjadôrs. Aleluja.

Vanseli: La lebre j sparìs e al reste smondeat.

Dal Vanseli seont Marc 1, 40-45
Alore: j capite dongje a Gjesù un lebrôs a suplicâlu, e in genoglon j dîs: «Se tu ûs, tu puedis smondeâmi!».
Al à coopassion, al slungje la so man, lu tocje e j dîs: «O lu uèi, smondèjti!».
Sul colp la lebre j sparìs e al reste smondeât!
E cun muse dure lu pare-vie, e j dîs: «Viôt di no dî nuje a dinissun; ma va, mostriti al predi e ufrìs pe to salût ce ch'al à comandât Mosé, par che ancje lôr a vebin une prove».
Ma chel al va-vie e al scomence a fevelâ e a contâ la robe, e cussì Gjesù nol podeve plui jentrâ tune sitât in public, ma al stave di fûr, tai puescj fur di man e di ogni bande a vegnìvin a cirîlu.
Peraule dal Signor. La Laut a ti, o Crist!


An C
Prime leture: Maludît cui ch’al spere tal om, benedît cui ch’al spere tal Signor.

Dal libri dal profete Gjeremie 17,5-8
Il Signor al dîs: «Sèjal maludît chel om ch’al spere tun altri om e al crôt che int, fate di cjar, a sèi il braç che lu vuarde, e al lasse che il so cur al moli il Signor.
J tocjarà come ‘e jerbe salvadie tal desert; nol gjoldarà nancje cuant ch’al rivarà il ben, al vivarà te tiare brusade dal desert, plene di sal, dulà che no si pò vivi.
Benedet sèjal chel om ch’al spere tal Signor, parcé ch’al è il Signor che lu vuarde.
J tocjarà come al len plantât dongje da l’aghe, ch’al slungje lis sos ladrîs tal umit dal riul: nol patissarà s’al ven il cjalt, lis sos fueis a saràn simpri frescjis; e, nancje s’al ven il sut, nol varà pore e al fasarà istes lis sos pomis.
Peraule di Diu. Ringrassiin Diu

Salmo cul Responsori Sal. 1, 1-2. 3. 4 e 6

R. Furtunât l’om che si fide dal Signor. (R.: Sal. 39, 5c)

Furtunât l’om che no si lasse menâ ator dai triscj,
nol pôe pît su la strade dai pecjadors,
no si sente te congreghe des lengatis;
ma che j plâs il bonsavôr de leç dal Signor,
e la rumíe dì e gnot.

Al è come un len plantât sul ôr da l’aghe,
cjariât di pomis tal moment just,
che nol viôt mai a inzalîsi lis sos fueis;
dut ce ch’al scomence lu finís.

Ai triscj, mo, no ur va cussì;
a son come stram puartât-vie dal ajar.
Parceche Diu al ten di voli la strade dai juscj,
e chê dai triscj e mene a pièrdisi.

Seconde leture: Se Crist nol è rissussitât, o crodèis dibant.

De prime letare di Pauli apuestul a chêi di Corínt 15, 12. 16-20
Fradis: s’al è vanseli che Crist al è rissussitât dopo muart, cemût êse ch’al è cualchidùn tra di vualtris ch’al dîs che i muarts no risurìssin?
Parceche se i muarts no rissurìssin nancje Crist nol è rissussitât.
Se Crist, po, nol è rissussitât, la vuestre fede e jè une stupidagjine, o sèis ancjemò tai vuestris pecjâts. Cussì ancje chêi ch’a son muarts in Crist le àn finide mâl.
S’o sperìn in Crist dome par cheste vite, o saressin j umign ch’a fasin plui dûl di ducj.
Invessi Crist al è rissussitât dopo muart, prime flor dai muarts.
Peraule di Diu. Ringrassiin Diu.

Aleluja Lc. 6,23

Aleluja. Gjoldèit e stàit legris,
parceche la vuestre pàe e sarà tant grande tal cîl. Aleluja.

Vanseli: Furtunâts vualtris puars. Di vuardi vualtris siors.

Dal Vanseli seont Luche 6, 17.20-26
In che volte: Gjesù, vignint-jú cui dodis, si fermà tun puest dut plan, cun tune grande turbe di dissepui e tante int dal popul di dute la Giudee, di Gjerusalem e de riviere di Tyr e di Sidon.
E lui alçant i voi sui siei dissepui al diseve:
«Furtunâts vualtris puars, parceche il regno di Diu al è vuestri.
Furtunâts vualtris che cumò o vèis fan, parceche o sarèis saceâts.
Furtunâts vualtris che cumò o vaîs, parceche o ridarèis.
O sarèis furtunâts cuant che la int us odearà, e cuant che us pararàn-fur, us disaràn improperis, e a pararan-jú dal lor libri il vuestri non come ch’o fossis carognis e dut parvie dal fi dal om; in che volte gjoldèit e stàit legris, parceche la vuestre pàe e sarà tant grande tal cîl.
I lor paris e àn tratât cussì ancje i profetis.
Ma, di ‘uardi vualtris siors, parceche o vèis vude la vuestre consolazion.
Di ‘uardi vualtris ch’o seis sglonfs cumò, parceche o varèis fan.
Di ‘uardi vualtris ch’o ridèis cumò, parceche o varèis ce lamentâsi e ce vaî.
Di ‘uardi cuant che ducj a disaràn ben di vualtris; cussì e àn fat ancje ai profetis fals i lor paris.
Peraule dal Signor. La laut a ti, o Crist.

Su lis ufiertis

O Diu, ti preìn che cheste nestre ufierte nus lavi e nus comedi e, deventâts ubidients a ce che tu comandis, nus fasi mertâ il premi che nol finirà mai.
Tal domandin par Crist nestri Signor. Amen.

Antifone di Cumunion Sal. 77,29-30

Lôr e an mangjât fin a saceâsi;
il Signor ur à dât ce ch’a bramavin;
in te lor brame no son stâts imbroâts.

o ancje: Zuan 3, 16

Diu al à ulût tant ben al mont, ch’al à dât il so Fi unic par che ducj chêi ch’a crodin in lui no si pierdin, ma ch’a vêbin la vite eterne.

Dopo de Cumunion

Diu, finît il past des buinis robis che tu nus âs preparât, ti preìn di fânus vê simpri fan di chês che nus fasin vivi pardabon.
Tal domandin par Crist nestri Signor. Amen!