PARABOLA DEL FIGLIUOL PRODIGO
dal Vocabolari "Jacopo Pirona" ed 1871 stanpât a Vignesie, che il dr. Antonino De Longa di Udin al ten cont come une reliquie.

DIALETTO DI UDINE.

11. Un omp al veve doi fîs.
12. E il plui ‘sovin al disé a so pari: Pari, dami la part dai bens che mi ven; e il pari al spartì tra di lôr i bens.
13. E dopo pôs dîs, ingrumàde su dute la so robe, al lè vie in t’un paìs lontan, e là al strassà la so facoltàd vivind, disonestamentri.
14. E dopo ch’al vè spindùd dutt, e’ vignì in chell pais une gran çharistìe, di múd che lui al scomensà a vê bisùgne.
15. E al lè, e al si metè cun-t’-un omp di chell paìs, che lu mandà in tai sièi çhamps a pàssi i purscièj.
16. E lui al veve vòe di jemplàssi il cuarp di gland, che mangiavin i purscièj, ma nissun i in dève.
17. Ma tornàd in sè stess, al disé: Se-tançh operàris di miò pari e’ àn pan tan ch’an vuèlin, e jò o mûr di fan.
18. O’ mi çholarài su, e o’ larai là di miò pari, e i dirài: Pari o’ ài peçhàd, cuintri il seil, e viàrs di te.
19. E no sòi plui den di jessi clamàd to fi; tenmi come un dai tièi servitòrs.
20. E al si jevà su, e al tornà là di so pari; e cuand ch’al jere ançhimò lontan, so pari lu vedè, e al vè compassiòn di lui, e al corè, e i si butà a brassecuèll, e tu bussà.
21. E il fi i disé: Pari, o’ ài peçhàd cuintri il seil e viàrs di te, e no soi plui den di jessi clamàd to fi.
22. Ma ‘1 pari al disé ai sièi servitors: puartàit cà il plui biell vistìd, e vistìlu, e metèj un anell tal ded, e lis scarpis tai pîs.
23. E menait fûr il vigiell di grasse, e massàilu; e mangin, e gioldìn.
24. Parscèche chest miò fi al jere muart, e al è tornad a vivi; al jere piardûd, e al è stad çhatàd. E a si metèrin a fâ gran fieste.
25. Ma il fi plui grand al jere tai çhamps, e biell tornand, cuand eh’ al jere donge çhase, al sintì a sunâ e balâ.
26. E clamàd un dai servitòrs, al domandà sce che ‘1 jere nassùd.
27. E lui a i disé: Al è tornad to fradi, e to pari al à massàd il vigiell di grasse, parscèche al è tornàd san e salf.
28. Ma lui al s’inrabià, e nol volè entrâ: alore so’ pari al saltà fûr e lu preàve di jentrà.
29. Ma lui rispuindìnd al disé a so pari: E’ son tançh angns che jo ti siàrv, e no ài mai disubidìt a un to comand, e’ pur no tu mi às mai dade n’ançhe une curtùsse par frajàle insieme cui miei amìs.
30. Ma apène che chest to fi ch’al à mangiad dutt sce ch’al veve cu lis busarònis, al è vignud, tu tu i às massàd il vigjell di grasse.
31. E lui i disé: Fì, tu tu ses simpri con me, e dutt sce che o’ ài l’è to.
32. Ma cumò cunvignìve di fâ fieste, e di gioldi, parscèche chest to fradi al jere muart e al è tornad a vivi, al jère piardùd, e al è stad çhatàd.