8 di Dicembar

FIESTE DE Concezion Inmaculade de Vergjine Marie

Antifone di jentrade Is. 61, 10

O soi plene di gjonde tal Signor,
il gno cur al è sglonf di ligrie,
parceche mi à mituts intor i vistîts ch’a salvin,
mi à vuluçade cu la manteline de justissie,
come ch’o fos une nuvice plene di gorais.

Oremus: Preìn: Diu, che cu la concezion inmaculade de Madone tu âs preparade al to Fi une scune come ch’al lave ben, ti domandin che tù, che tu le âs tignude nete di ogni magle pai merits che vevin di cuistasi cu la muart dal to Fi, tu nus fasis rivâ monts e nets là di te.
Tal domandin par Gjesù Crist nestri Signor e to Fi ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture: Tú e la femine si cjalarèis di neri.

Dal libri de Gjenesi 3, 9-15. 20.
Dopo che Adam al à mangjât di chel arbul, il Signor Idiu lu à clamât e j à dite: «Dulà sèstu?».
E lui: «O ài sintude la to vôs tal sardin e o mi soi vergognât di jessi crot e o soi lât a platâmi».
Alore j dîs: «Cui ti puedial vê fat savê che tu jeris crot? astu cerçât di chel arbul ch’o ti vevi comandât di no metint in bocje?».
Adam al dîs: «E jè stàde la femine, la compagne che tu mi âs dade, che mi à dât di cerçe di chel arbul, e jo o ài cerçât».
Alore Diu, il Signor, al dîs ‘e femine: «Parcé àstu fat cussi?».
E jê: «Al è stat il sarpint che mi à imbroade, e jo o ài cerçât».
Alore Diu, il Signor, al dîs al sarpint: «Parceche tu âs fate une tâl, tu sês la bestie maludide jenfri dutis lis bestiis de tiere: tu ti strissinarâs indenant cu la panse e tu mangjarâs tiere par dute la to vite. O metarai tìchignis fra te e la femine, fra la to gjernassie e la sô e cheste a sfracajarà il to cjâf e tú tu j cirarâs di muardi il talon».
E l’om al à metût ‘e so femine il non di Eve, par-vie ch’e sares stade la mari di ducj chêi ch’a vivin.
Peraule di Diu. Ringrassiin Diu!

Salmo cul-Responsori Sal. 97, 1. 2-3ab. 3c-4

R. Cjantàit al Signor un cjant gnûf,
parcé ch’al à fat robis maraveosis. (R. 1)

Cjantàit al Signor un cjant gnûf,
parcé ch’al à fat robis maraveosis;
lu à fat vinci la so man gjestre,
il so braç sant. (R. 1)

Il Signor al à pandût ch’al à vinçût,
al à pandude la so justissie in face di ducj i popui.
Si è ricuardât dal so boncûr par Jacop
e de so peraule pal ben de famee di Israel. (R. 1)

Dut il mont fin tal ultin cjanton al à viodût
che il nestri Diu al à vinçût.
Dute la tiere che uchi pal Signor:
cjantàit, ucàit, sunàit. (R. 1)

Seconde leture: Diu nus à sielzûts par Crist ancjemò prin di meti lis fondis dal mont.

De letare di Pauli apuestul a chêi di Efeso 1, 3-6. 11-12
Fradis: Benedet Diu e Pari dal Signor nestri Gjesù Crist, che sù tai cî nus à jemplâts di ogni sorte di benedizions spirtuals in Crist, par-vie che nus à sielzûts in lui prin di butâ lis fondis dal mont, par ch’o fossin sants e cence maglis denant dai siei voi, che nus à predestinâts cul so boncûr a jessi siei fîs di anime midiant di Gjesù Crist, seont la so buine volontât, par che si laudi a public chê so gracie, che nus à regalade in chel che lui al ame di cûr.
Propit in lui o sin stâts sielzûts e predestinâts seont il plasè di chel ch’al messede dut cemût ch’al ûl, par che nô, ch’o sin stâts i prins a sperâ in lui, o fossin la laude publiche de so glorie.
Peraule di Diu. Ringrassiin Diu!

Aleluia Lc. 1, 28

Aleluia. Gjolt, plene di gracie, il Signor al è cun te.
Benedete tù, plui di dutis lis feminis. Aleluia.

Vanseli: Gjolt, plene di gracie, parceche il Signor al è cun tè.

Dal Vanseli seont Luche 1, 26-38
Alore: al ven mandât l’agnul Gabriel da part di Diu tune sitât ch’a j disin Nasaret, là di une vergjine imprometude a un om di non Josef de famee di Davit e la vergjine e veve non Marie.
Jentrât là ch’e jere jê, j dîs: «Gjolt, plene di gracie, parceche il Signor al è cun te».
Jê, a sintî fevelâ cussì, si spavente e a pense ce ch’al podeve dî un salût dal gjénar.
E l’agnul j dîs: «No sta vê pore, Marie, parceche Diu ti à agrât e vè che tu cjaparâs-sú tes vissaris e tu parturirâs un frut e tu j metarâs il non di Gjesù. Lui al sarà grant e j disaràn fi dal Altissin; il Signor j darà il trono di Davit, so pari, e al regnarà su la famee di Jacop par simpri, e no sarà fin pal so regno».
Marie e dîs al agnul: «Po cemût puedial sucedi? parceche jo no cognos om».
E l’agnul j rispuint: «Spirtu Sant al vignarà sore di te e fuarce dal Altissin ti fasarà ombrene. E vè che Lisabete, de to parentât, ancje jê e spiete un fi te so vecjaie, e chest al è il sest mes par jê che j disin ch’e spiete dibant, parceche no si pò dî nuie ch’al sei impussibil par Diu».
Marie alore e dîs: «Vè chi la sierve dal Signor; che mi sucedi seont la to peraule».
E l’agnul si slontanà di jê.
Vanseli dal Signor. La Laut a tì, o Crist!

Su lis ufiertis

Signor, vèj agrat cheste ufierte pe salvece ch’o ti fasin te fieste de Concezion Imaculade de Madone e, come ch’o crodin che jê, cence magle, midiant de to gracie che le à parade in anticipo, cussì, midiant des sos preieris, netinus di ducj i pecjâts.
Tal domandin par Gjesù Crist nestri Signor. Amen.

Prefassi
Al è just, al va ben e al conven ringrassiati te, simpri e dapardut, Signor, Pari, Diu onipotent eterno. Tù tu âs uardade la Vergjine Marie de magle dal pecjât di fonde, par che, plene di gracie, e deventàs la mari come cu va di to Fi. Cun jê tu âs començât a plantâ la glesie, nuvice di Crist, biele, cence grispis e cence maglis. La Vergjine langide come la lus dal soreli e veve di parturî il Fi, Agnel ch’al pare-jú lis nestris maglis; e tù tu le âs destinade, sicu flor di dut il mont, a jessi l’esempli di santitât e l’avocatesse di gracie pal to popul.
E nô, dutune cui agnui o cjantin in gjonde la to glorie.

Antifone di Cumunion

A son stadis ditis tantis bielis robis di te, Marie,
parceche tu âs parturît il soreli de justissie, Crist nestri Signor.

Dopo de Cumunion

Signor, nestri Diu, i sacraments ch’o vin ricevûts ch’a nus uarissin dai colps di chel pecjât, che tu as parade in anticipo la Madone in te so Concezion Imaculade.
Tal domandin par Gjesù Crist nestri Signor. Amen!