Sants CANZI, CANZIAN
E CANZIANILE
Fieste grande a Gonars, Pantianins, Pradielis e Risan te diocesi di Udin; plui a s. Canzian te diocesi di Gurize.
Antifone di jentrade

Chel ch’al à fat il mont e poleât l’om,
al è ancje bon di fânus rissurî s’o murìn par lui.

† In non dal Pari e dal Fi e dal Spirtu Sant. R. Amen.
† La gracie di nestri Signor Gjesù Crist, l'amor di Diu Pari
e l'unzion dal Spirtu Sant sèino cun ducj vualtris. R. E ancje cun tè.

La confession † Par jessi pronts a celebrâ i sants misteris, fradis, domandin perdon dai nestris pecjâts.

Ve’ dûl di me, Signor, te to bontât,
e pe to misericordie pare jù il gno pecjât.

Cu la to gracie lave la me cussiense,
cu la to lûs fasimi rivâ ‘e sapiense.

Lontan dai tiei voi no sta parâmi,
puar e malât no sta lassâmi.

Fàsimi cognossi e amâ lis tos stradis,
dâmi un cûr plui viert par Te e pai fradis.

Dâmi simpri umiltât e pentiment:
mi judaràn a vê pâs e sintiment.

Cussì o podarìn ufrîti un sacrifici spirtuâl
e la tiare dute e sarà il to altâr.

† Diu onipotent vebi misericordie di nô,
nus perdoni i pecjâts e nus meni in Paradîs R. Amen.

† Oremus: Preìn: Signor, che tu âs dât il coragjo di patî e murî par Te al pari Canzi e ai fîs Canzian e Canzianile, fasinus la gracie che lis nestris fameis a conservin dutune la fede di pari e di rissurî cun te.
Tù tu sês Diu e tu vivis e regnis dutune cul Pari e cul Spirtu Sant par ducj i secui dai secui.
R. Amen.

Prime leture: A son chêi ch’a vegnin de grande persecuzion.

Dal libri de Apocalisse di Zuan apuestul 7, 9. 14b-17
Jo Zuan o ài viodût un spetacul di int di no podê nancje contâ, di ogni gjernassie, tribù e popul e lenghe, in pins denant dal trono e in face dal Agnel, vistûts a blanc e cu lis ramis di palme in man.
Un dai viei mi dîs: A son chêi ch’a vegnin de grande persecuzion e ch’e àn lavât i lor vistîts monts e nets tal sanc dal Agnel. Parchel a stan denant dal trono di Diu e lu servissin dì e gnot tal so templi.
E chel ch’al è sentât sul trono al slargjarà su di lôr la so tende.
No varan plui ne fan ne sêt; no ju brusarà plui l’aiar cjalt ne il soreli, parceche l’Agnel, ch’al sta tal mieç dal trono, ur fasarà di pastor e ju menarà là des risultivis de aghe ch’e ten-sú la vite.
E Diu ur suiarà dutis lis lagrimis dai lor ceis.
Peraule di Diu. R. Ringrassiin Diu.

Salmo cul responsori Sal. 33, 2-3. 4-5. 6-7. 20-21

R. Furtunâts chêi ch’a si fidin dal Signor. (R.: 9b)

Benedet sèial il Signor ogni moment,
la me bocje che lu laudi di un continuo.
La me anime si vante dal Signor,
che lu sepi la puare int e ch’e stèj contente.

Fasèit fieste insieme cun me al Signor,
tignín-sú il so Non ducj dacordo.
Jo o ài cirût il Signor e lui mi à scoltât,
e mi à diliberât di dutis lis poris.

Cjalàilu lui e o sarèis contents,
no deventarà rosse la vuestre muse.
Chest puar om al à dât un berli,
e il Signor lu à sintût e lu à tirât-fûr di ducj i pericui.
Al just a puedin capitâ tancj malans,
ma il Signor lu vuarde;
al ten cont dai siei vuès,
nancje un no si romparà.

Seconde leture: Ducj chêi ch’a uelin vivi come cu va in Crist Gjesù a saran perseguitâts,

De seconde letare di Pauli apuestul a Timoteo 2, 8-13 . 3, 10-12
Fradi, ricuarditi che Gjesù Crist, de gjernassie di Davit, al è rissussitât dai muarts, seont il gno vanseli; e al è parchel che jò o patìs di dut, fint a finîle in preson come un pôcdibon, ma la peraule di Diu no si rive adore di leâle. Parchel jo o sapuarti dut par amor dai sielts, par che ancje lôr a vebin la siorte di salvâsi in Crist Gjesù cu la glorie eterne.
Cheste e jè peraule che merte crodude: s’o murín dutune cun lui, ancje o vivarìn dutune cun lui; s’o tignìn-dûr o regnarìn ancje cun lui; s’o lu rifudarìn, ancje lui nus rifudarà.
Se nô o mancjìn di peraule, lui la manten, parceche nol pò lâ cuintri ce ch’al è.
Cjar fradi, tù tu sês vignût daur di me in ce ch’o ài insegnât, tal mût di fâ, tes ideis, te fede, tal savê lassâ cori, tal amor di Diu, te passiense, tes persecuzions, tai malans che mi son capitâts a Antiochie, a Iconi, a Listri.
E chês persecuzions o soi stât bon di sapuartâlis e il Signor mi à diliberât di dutis.
Po, ducj chêi ch’a uelin vivi come cu va in Crist Gjesù a saran perseguitâts.
Peraule di Diu. R. Ringrassiin Diu.

Aleluia

Aleluia. Chel ch’al è dacordo cun mè denant dai umign,
ancje Jo o sarai dacordo cun lui denant dal Pari ch’al è tai cî. Aleluia.

Vanseli: Us strissinaran denant dai governadors e dai rès par cause mè, come testemonis sul gno cont par lôr e pai popui.

Dal Vanseli seont Mateo 10, 17-22
Alore Gjesù al à dite ai siei apuestui:
Stàit atents dai umign, parceche us menaran in tribunâl, us sgorearan tes lor sinagoghis, us strissinaran denant dai governadors e dai rès par cause mê, come testemonis sul gno cont par lôr e pai popui.
Cuant che us cjaparan, no stàit a bassilâ di cè ch’o veis di rispuindi, parceche us vignarà-sú in chel moment ce ch’o veis di dî; no fevelarèis vualtris, ma il Spirt di vuestri Pari al fevelarà par vualtris. Il fradi al fasarà murî so fradi e il pari so fi e i fîs si jevaran-sú cuintri i gjenitors e ju fasaran murî. Ducj us odearan par-vie dal gno Non, ma cui ch’al ten dûr fin tal ultin chel al sarà salf.
Vanseli dal Signor. R. La Laut a ti, o Crist!

Ofertori

† Sestu benedet, Signor, Diu di dut il mont, parceche o vin vût de to bontât chest pan, midiant de tiare e de nestre fadie; t’al presentin a ti par ch’al deventi il nestri mangjà di vite eterne.
R. Benedet par simpri il Signor.

† Pal misteri di cheste aghe e di chest vin fasinus la gracie di vivi de vite di chel che si è indegnât di deventâ compagn di nô.

† Sestu benedet, Signor, Diu di dut il mont, parceche o vin vût de to bontât chest vin, midiant de vît e de nestre fadie; t’al presentin a ti par ch’al deventi il nestri bevi di salvece.
R. Benedet par simpri il Signor.

† Vierç, Signor, la to puarte a nô, malapaiâts e pintûts dafons da l’anime e vê agrât il sacrifici ch’o fasìn in presince di tè.

† Lave, Signor, lis mes inicuitâts e smondeimi di ducj i pecjâts.

† Preait, miei fradis, par che Diu Pari onipotent vebi agrât il sacrifici gno e vuestri.
R. II Signor ricevi bulintîr des tos mans chest sacrifici
a glorie e laut dal so Non,
pal nestri ben e par chel di dute la so sante glesie.

Su lis ufiertis

† Vê agrât, Signor, chest pan e chest vin ch’o ti presentin te fieste dai nestris martars Canzians e, in cuintrigambio, fasinus la gracie di crodi che, patî e murî par Te al è un vuadagn.
Tal domandin par Crist, nestri Signor. R. Amen.

GRANDE PREJERE

Prefassi

† Il Signor cun vualtris. R. E ancje cun te.
† I nestris curs adalt. R. Ju vin arcats pal Signor.
† Ringrassiin il Signor nestri Diu. R. Al è just e al va ben.
† Al è just, al va ben e al conven ringrassiâti te simpri e dapardut, Signor, Pari sant, Diu onipotent eterno.
Il sanc, che i nestris martars e àn spandût a glorie dal to Non e daûr l’esempli di Crist, nus sburte a crodi tal jutori de to gracie par mantegni la fede e vê il coragjo ch’al covente cuant che si crôt di no vêlu.
Midiant di lui, dutune cui agnui e cui sants, ti cjantin, cence mai fermâ l'ino di glorie.

Sant, sant, sant, al è il Signor, Diu di dut il mont.
I cî e la tiare a son plens incolms de to glorie.
Osana adalt tai cî!
Benedet seial cui ch'al ven tal non dal Signor, Osana adalt tai cî!

Clamade dal Spirtu Sant

† Pari, risultive di dute la santitât, tu sês pardaver Sant.
Mande, par plasé, la rosade dal to Spirt su chescj regai
par ch’a deventin par nô il Cuarp e il Sanc di nestri Signor Gjesù Crist.

† Lui, lant incuintri di so volontât a la Passion al cjolé-sú il pan e, fate la preiere di ringrassiament, lu crevà, lu spartì ai siei dissepui e al disé: CJOLEIT E MANGJAINT DUCJ, PARCECHE CHEST AL È IL GNO CUARP CH'AL VEGNARÀ DÂT-VIE PAR VUALTRIS.

† Te stesse maniere dopo vê cenât, al cjapá-sú il cjaliç e tornant a ringrassiâti, lu passà ai siei dissepui e al disè:
CJOLEIT E BEVEINT DUCJ,
PARCECHE CHEST AL È IL CJALIÇ DAL GNO SANC
DAL GNÛF TESTAMENT ETERNO
CH'AL VEGNARÀ SPANDÛT PAR VUALTRIS E PAR TANCJ DI LÔR, A REMISSION DAI PECJÂTS. FASEIT CUSSÍ PAR VISÂSI DI MÊ.

† Al è grant il misteri de fede:
R. Cuant ch'o mangjìn di chest pan e ch'o bevìn di chest cjaliç o
predicjìn la to muart, Signor, fin cuant che tu tornis.

La ufierte de glesie

† Visansi de muart e de rissurezion di lui, nô ti ufrin, Pari, il pan ch’al dà la vite e il sanc ch’al puarte la salvece, e ti ringrassiin, parceche tu nus âs ritignûts bogns di servîti propit a la to presince.

† Ti prein, a schene plete, che, dopo jessi stats a part dal Cuarp e dal Sanc di Crist, o vebin di jessi metûts adun dal Spirtu Sant.

Preieris di ricuart

† Visiti, Pari, de to glesie sparniçade pardut il mont e fasile madressi tal amor dutune cul nestri Pape Benedet XVI° e cul nestri Vescul Pieri, cun ducj i predis e cun dut il to popul.

† Visiti ancje dai fradis che si son indurmidîtss-vie cu la sperance de rissurezion e di ducj chêi ch'a sperin tal to boncûr: fasiur viodi il splendor de to muse.

† Ve dûl, par plasé, di ducj noaltris par ch’o podìn mertâ di jessi a part de vite eterne e laudâti e benedîti insieme cu la Vergjine Marie, Mari di Diu, cui Apuestui: sants Canzi, Canzian e Canzianile; cui sants Macôr e Furtunât, e cun ducj i Sants che che tu âs vût agrât di dutis lis etis in cà:
e in Gjesù Crist, to Fi o intonarin la cjante de to glorie.

Conclusion

† Midiant di lui, cun lui e in lui, ricêf, Diu Pari, che dut tu puedis, dutune cul Spirtu Sant, dut l'onor e dute la glorie par ducj i secui dai secui. R. Amen.

Pater noster

† Par ordin dal Salvador e scuelâtts de dutrine dal Signor, disìn cun scletece:
R. Pari nestri che tu sês in cîl,
ch’al sei santificât il to Non, ch'al vegni il to regno,
ch'e sei fate la to volontât come in cîl ancje in tiare;
il pan che nus covente danusal ué,
e perdoninus i nestris debits, come ancje nô ju vin perdonâts ai nestri debitors,
e no sta mètinus te tentazion, ma libèrinus dal trist.

.Simpri cui braz a larc al va indenant dibessôl:

† -Diliberinus, Signor, di ogni sorte di mai, concedinus la pâs al nestri vivi, e cul jutori de to misericordie o sarin simpri cence pecjat e cence nissune conturbie, intant ch'o spetin la sante sperance cu la vignude dal nestri Salvador Gjesù Crist.
R. Ream, podé e glorie a son tiei par simpri

La pâs

† Signor Gjesù Crist, che tu âs dit ai Apuestui: «Us lassi la pâs, us doi la me pâs», no sta badâ ai nestris pecjâts, ma cjale la fede de glesie tô e indegniti di dale dongje te pâs, come ch'e jè la to volontât.
Tú che tu vivis e regnis par in eterno. R. Amen.

† La pâs dal Signor par simpri cun vualtris. R. E ancje cun tè.

† Dàisi la pâs!
† Il Cuarp e il Sanc di nestri Signor Gjesù Crist metûts insieme ch’a zovin pe vite eterne a nô che ju mangjín.

R. Agnel di Diu, che tu ti cjapis-sú i pecjâts dal mont, vê dûl di nô.
R. Agnel di Diu, che tu ti cjapis-sú i pecjâts dal mont, vê dûl di nô.
R. Agnel di Diu, che tu ti cjapis-sú i pecjâts dal mont, danus la pâs a nô
.
LA CUMUNION

† La cumunion cul to cuarp e cul to sanc, Signor Gjesù Crist, che no deventi par mè une condane, ma pal to boncur mi vuardi ta l'anime e tal cuarp.
† Furtunâts chêi ch'a son invidâts 'e cene dal Agnel.
Vèlu chi l'Agnel di Diu che si cjape-sú i pecjâts dal mont.
R. Signor, no soi degn che tu vegnis in cjase mê,
ma cun tune sole to peraule jo o sarai salvât.
† Il Cuarp di Crist. R. Amen.

Antifone di Cumunion

Ce ch'o vin cjapat-sú cu la bocje, Signor, fânusal cjapâ-sú cun scletece ancje cu l'anime, e il regal di un moment nus vuardi par simpri.

Dopo de Cumunion

† Signor, a nô ch’o vin vude la gracie di mangjâ ae to taule il pan de Eucaristie, pai meris dai nestris martars Canzians fasinus gjoldi di podê rissurî un’altre dì dutune cun Crist, muart e rissurît par nô.
Tal domandin par lui ch’al è il nestri Signor. R. Amen.

Benedizion a la fin de Messe

† Il Signor cun vualtris. R. E ancje cun te.

† Diu Pari, che simpri al vîf, us conservi dutune; e la pâs di Crist ch'e sei di cjase par simpri là di vualtris. R. Amen.

† Ch'o seis furtunâts cui fîs, che us zovi il confuart dai amîs, ch’o seis in buine armonie cun ducj. R. Amen.

† Testemoneàit in public l'amor di Diu: ducj chêi che us cjataràn plens di boncûr pes lôr dibisugnis e pai lor dolors ch'a vebin di jessius agrât une dì, cuan’che a bracecuel us alcolzaràn te vere cjase dal Pari. R. Amen.

† E ducj vualtris ch'o si cjatàis chi a ringrasiâ il Signor, che us benedissi Diu onipotent, Pari, Fî e Spirtu Sant. R. Amen.

Cumiât

† La Messe e jè finide, làit cun Diu. R. Grassie a Diu.