2 di Novembar

RICUART DI Ducj MUARTS

Tierce Messe

Antifone di jentrade Rom. 8, 11

Diu, ch'al à rissussitât dai muarts il Crist,
al fasarà vivi ancje i nestris cuarps ch'a muerin,
midiant dal so Spirt ch'o vin intorsi.

Oremus: Preìn: Diu onipotent, che il to Fi unic al è passât di chest mont 'e gjonde dal to ream midiant il misteri di pasche, fâs la gracie ai nestris fradis defonts di vinci dutune cun lui la muart e di podê viodi in muse par sinpri te, o Pari, che tu ju âs creâts e salvâts.
Tal domandin pal nestri Signor Gjesù Crist, to Fi ch'al è Diu, e al vîf e al regne dutune cun te e cul Spirtu Sant par ducj i secui dai secui. Amen.

Prime leture
Ju à vûts agrât tan'che un sacrifici intîr.

Dal libri de Sapiense 3, 1-9
Lis animis dai juscj a son in man di Diu, la pore di murî no lis tocjarà. Ai voi de int cence sintiment al à sameât ch'e murissin; la lor fin e à parût une disgracie, il lassânus un malan, inpen che lôr sì cjatin te pâs.
Ancje se in face dai umign a son cjastiâts, lôr a son incolms de sperance di no murî.
Par un patî curt a varan un grant ben, parceche Diu ju à pesâts e ju à cjatâts int ch'a merte;
ju à stazâts come l'aur tal fornel e ju à vûts agrât tan'che un sacrifici intîr.
Tal dì dal lor judissi a lusiran; si spandaran come fûc te lescje.
A rezaran i forescj,
a fasaran di sorestants sui popui,
il Signor al sarà sinpri il lor rè.
Chêi che si fidin di lui a capiran la veretât;
chêi ch'a restin cun lui a vivaran cun lui in caritât,
parceche gracie e boncur a son dome pai siei.
Peraule di Diu. Ringrassiin Diu

Salmo cul Responsori Sal. 41, 2. 3. 5bcd; Sal. 42, 3. 4. 5.

R. La me anime e à sêt dal Diu ch'al vif. (R.: 41, 3)

Come la cerve plene di sêt a cîr un roiuç,
cussì la me anime a brame te, Diu gno.
La me anime e à sêt dal Diu ch'al vif;
cuant tornarâio a presentâmi denant de to face? - (R.: 41, 3)

Ce biel ch'al ere lâ-sú te cjase dal Signor,
in teste de prucission,
cjantant di ligrie e di gjonde
cun tante int contente. - (R.: 41, 3)

Dâmi la to lûs e la to peraule;
ch'a mi menin lôr su la to sante mont,
a cjase tô. - (R.: 41, 3)

Ch'o puedi rivâ là dal altar di Diu,
di chel Diu ch'al è la me gjonde,
e ti disarai grassie cu la citare plen di legrie,
Signor Diu gno. - (R.: 41, 3)

Anime mê, parcé ti butistu-jú?
parcé bassilistu?
Spere che il Signor ti fasi tornâ a laudâlu,
lui ch'al è il Salvador de me face e il gno Diu. - (R.: 41, 3)

Seconde leture
La muart no sarà plui.

Dal libri de Apocalisse di Zuan apuestul 21, 1-5a. 6b-7
Jo Zuan o ài viodût un cil gnûf e une tiere gnove,
parceche il cil e la tiere di prime a jerin sparîts e il mar nol ere plui.
E o ài viodût la sitât sante, la Gjerusalem gnove, ch'e vignive jú dal cil, d'indulà ch'al è Diu,
ben mitude come une nuvice pronte pal so nuviç.
Alore o ài sintût une vôs che diseve dal trono:
«Ve' chi la tende di Diu cui umign e lui al vignarà a stâ cun lôr,
e lôr a saran il so popul e lui al sarà il "Diu-cun-lôr".
Lui ur suarà lis lagrimis dai lor ceis;
la muart no sarà plui, ni corot, ni laments, ni dolôr, parceche il vecjo mont nol è plui».
Alore chel sentât sul trono al à dit:
«Ve', jo o torni a fâ
A chel ch'al à sêt io j darai di bevi a gratis de risultive de vite.
Chel ch'al vinç al varà cheste part di rigjitât,
e jo o sarai il so Diu e lui al sarà gno fi.
Peraule di Diu. Ringrassiin Diu

Aleluia Mt, 11, 2 5

Aleluia. O ti laudi, o Pari, Signor dal cil e de tiere,
che tu âs pandûts ai piçui i misteris dal regno dai cî. Aleluia.

Vanseli
Stait contenz e plens di gjonde parceche la vuestre pae a jè grande in cil.

Dal Vanseli seont Mateo 5, 1-12a
Alore: viodude tante int, Gjesù al va su pe mont, e, cuant che si è sentât, j van dongje i siei dissepui.
Al à scomençât a insegnâur cussì:
Furtunâts i puars ta l'anime, parceche il regno dai cî al è lôr.
Furtunâts chêi ch'a vàin, parcech'a saran consolâts.
Furtunâts chêi ch'a sapuartin, parcech'a saràn parons de tiere.
Furtunâts chêi che àn fan e sêt de justissie, parcech'a saràn saceâts.
Furtunâts chêi che àn misericordie, parcech'a cjataràn misericordie.
Furtunâts i monts tal cur, parcech'a viodaràn Diu.
Furtunâts chêi ch'a puartin la pâs, parceche ur disaràn fîs di Diu.
Furtunâts chêi ch'a son perseguitâts par-vie dal just, parceche il regno dal cil al è lôr.
O sareis furtunâts cuant che us insultaràn, us perseguitaràn e, cu la bausie, a disaràn ogni sorte di mal cuintri vualtris parvie di me. Stait contents e plens di gjonde, parceche la vuestre pàe a jè grande in cil.
Vanseli dal Signor. La Laut a tì, o Crist!

Su lis ufiertis

O Diu, paron dai vîs e dai muarts, plen di boncur cun ducj, perdone e cuiete in pâs i nestri fradis defonts, par che te to glorie ti laudin par simpri.
Tal domandin par Crist nestri Signor. Amen.

Prefassi dai muarts V.

Antifone di Cumunion Fil. 3, 20-21

O speti sicu salvador il Signor nestri Gjesù Crist,
ch'al darà un'altre filusumie al puar nestri cuarp,
fasinlu deventâ conpagn dal so cuarp gloriôs.

Dopo de Cumunion

Pari, ti vin ufiert chest sacrifici pai nestris fradis defonts; viergiur, par plasè, i braz dal to boncur, e, jessint tiei fîs d'anime cul batisin, regaliur a cjase tô la gjonde che no finis.
Tal domandin par Crist nestri Signor. Amen.