29-06-
FIESTE DI SAN PIERI E PAULI

Antifone di jentrade

Chescj a son i sants apuestui che, vivint caiú,
e àn plantade la glesie cul lor sanc;
e àn bevût il cjaliç dal Signor,
e a son deventâts amîs di Diu.

Oremus: Preìn: Diu che tu nus âs fat il plasé di une sante ligrie in cheste dì di fieste pai apuestui Pieri e Pauli, fâs la gracie ‘e to glesie di lâ in dut daûr di cè che àn insegnât lôr, che àn plantade la fede.
Tal domandin par Gjesù Crist nestri Signor e to Fi ch’al è Diu e al vîf e al regne dutune cun tè e cul Spirtu Sant par ducj i secui dai secui. Amen.

Prime leture: Cumò o sai che il Signor mi à tirât-fur des grifis di Erode.

Dal libri dai Fats dai apuestui 12,1-11
Alore il rè Erode al met la grife su int de glesie par fàur malans e al cope di spade Jacun, fradi di Zuan. Viodint che i gjudeos a jerin contents, al à fat cjapâ ancje Pieri. A jerin propit i dîs dal pan cence levan.
Cjapât che lu à, lu met in preson, consegnanlu a cuatri pichets di cuatri soldâts dalun; al oleve fâlu comparî denant dal popul subit dopo Pasche.
Pieri, duncje, al ere uardeât in preson, ma la glesie a preave Diu par lui cence padin.
In te gnot prin dal dì che Erode al veve di presentâlu al popul, Pieri, leât cun dôs cjadenis, al durmive in mieç di doi soldâts e denant la puarte lis sentinelis a vuardeavin la preson.
E ve’ ch’al rive l’agnul dal Signor e un sflandor al jemple il lûc.
L’agnul al dà une pocade a Pieri e lu dismôf e j dîs: «Jeve svelt!». E lis cjadenis a colin des sos mans.
L’agnul al continue «Mètiti la cinturie e i sandui».
Lui al fâs come ordenât.
E chel altri: «Ciape-sú la manteline su lis spalis e anin daurmi».
Pieri al jès daûr di lui, ma nol saveve che jere pure veretât cè ch’al capitave midiant dal agnul, parceche al crodeve di sumiâsi.
A passin denant de prime sentinele, po' de seconde e a rivin lì de puarte di fier che mene in sitât; la puarte si spalanche dibessole devant di lôr.
Une volte fur, s’invíin par une contrade e l’agnul dut tun moment lu lasse.
Pieri tornât in sè al dîs: «Cumò o ài capît pardabon che il Signor al à mandât il so agnul a diliberami des grifis di Erode e dal comparî denant dal popul dai Gjudeos».
Peraule di Diu. Ringrassiin Diu!

Salmo cul Responsori Sal. 33, 2-3. 4-5. 6-7. 8-9

R. L’agnul dal Signor al vuarde i siei. (R.: 8)

Benedet seial il Signor ogni moment,
la me bocje che lu laudi di un continuo.
La me anime si vante dal Signor,
ch’a lu sèpi la puare int e ch’a stei contente.

Fasèit fieste insieme cun mè al Signor,
tignin-sú il so Non ducj dacordo.
Jo o ài cirût il Signor, e lui mi à scoltât
e mi à diliberât di dutis lis poris.

Cjalàilu lui e o sareis contents,
no deventarà rosse la vuestre muse.
Chest puar om al à dât un berli
e il Signor lu à sintût e lu à tirât-fur di ducj i pericui.

L’agnul dal Signor al fâs une trincee
ator di chêi ch’a rispietin il Signor e ju salve.
Provàit e o viodarèis cetant bon ch’al è il Signor.
Furtunâts chêi che si fidin di lui.

Seconde leture: No spieti nuialtri, dome la zoe de justissie.

De seconde letare di Pauli apuestul a Timoteo 4, 6-8. 17-18
Cjar fi: jo o soi zà al licôf e al sta rivant il moment di lâ.
O ài scombatût la buine batàe,
o ài finide la corse,
o ài mantignude salde la fede.
Oramài e jè pronte par mè la zòe de justissie
che me darà il Signor in che sornade,
lui judiç just; e no dome a mi,
ma ancje a ducj chêi che àn bramât che lui si pandi.
Ma il Signor al è stât cun mè e mi à dât coragjo, par che la predicje dal vanseli e sei fate interie midiant di mè e ducj i popui la scoltin; e cussì o soi stât tirât-fur "de bocje dal leon".
Il Signor mi tirarà-fur di ducj i trucs e mi salvarà,
menanmi tal so regno sore i cî:
a lui la glorie tai secui dai secui. Amen.
Peraule di Diu. Ringrassiin Diu!

Aleluia Mt, 16, 18

Aleluia. Tù tu sês Pieri e sore cheste piere o tirarai-sú la me glesie
e lis puartis di cjadaldiaul no saran plui fuartis di jê. Aleluia.

Vanseli: Tù tu sês Pieti e o ti darai lis clâs dal regno dal cîl.

Dal Vanseli seont Mateo 16, 13-19
Alore: Gjesù al rive des bandis di Cesaree di Filip e al fâs cheste domande ai siei dissepui:
«La int cui disie ch’al sei il fi dal om?».
A disin: «Cualchidun Zuan il Batiador, altris Elie, altris Gjeremie o un profete».
Ur dîs: «Vualtris cui disèiso ch’o sei?».
Simon Pieri al ripuint: «Tù tu sês il Crist, il Fi dal Diu vîf ».
Gjesù j dîs: «Furtunât Tù Simon Barionà, parceche cjar e sanc no t’al àn pandût, ma il Pari gno ch’al è in cîl. E jo ti dîs che Tù tu sês Pieri e che sore cheste piere o tirarai-sú la me glesie e lis puartis di cjadaldiaul no saran plui fuartis di jê.
Ti darai lis clâs dal regno dal cîl e cè che tu learâs su la tiare al sarà leât tal cîl e cè che tu dislearâs su la tiare al sarà disleât tai cî».
Vanseli dal Signor. La Laut a tì, o Crist!

Su lis ufiertis

Signor, la preiere dai apuestui ch’a tegni daûr a chestis ufiertis ch’o consacrìn par tè, e che nus jempli di fede tal fâ cheste liturgje.
Tal domandin par Crist nestri Signor. Amen.

Prefassi

Al è just, al va ben e al conven ringrassiâti tè, simpri e dapardut, Signor, Pari, Diu onipotent eterno. Tù tu âs ulût ch’a fossin tan’che fradis chescj doi sants apuestui:
Pieri, il prin tal pandi la fede in Crist, Pauli tal capîle;
un, il pescjador di Galilee, tal plantâ la prime glesie cun cè ch’al vansave di Israel,
chelaltri, mestri tal predicjâ ai forescj, ancje lôr clamâts a crodi.
Cussì par stradis diferentis e àn dade dongje la famee uniche di Crist, e venerâts da dut il popul cristian a mertin la stesse zòe di glorie.
E nô dutune cui agnui e cui sants o cjantin, cence fermâ, la to laude.

Antifone di Cumunion Mt. 16, 16. 18

Pieri al à dite a Gjesù: Tù tu sês il Crist, il Fi dal Diu vîf.
E Gjesù j à rispuindût: Tù tu sês Pieri e su cheste piere o tirarai-sú la me glesie.

Dopo de Cumunion

Signor, nudrîts di chest misteri, fasinus la gracie di vivi in te glesie dacordo di cûr e di anime cul to amor di Diu, tignint salde la cene cul to pan e la dutrine dai apuestui.
Tal domandin par Crist nestri Signor. Amen.