2 di Fevrâr
MADONE DES CJANDELIS

Il Bambin Gjesù ufiért tal templi

Benedizion des cjandelis e purcission

Biel che s’impiin lis cjandelis, si dà-sú l’antifone:

Il Signor nestri Diu al vegnarà plen di fuarce
e al jemplarà di lûs ducj chêi ch’a crodin in lui, aleluia.

Il predi al fâs ‘e int cheste racornandazion:

Fradis benedets, a corante dîs de fieste grande di Nadâl, la glesie e ûl ch’o sèin contents ancje ué ch’o ricuardìn la presentazion di Gjesù tal templi.

Cun chê funzion lui al acetave di stâ a ce che comandave la leç antighe, ma plui ancjemò j stave a cûr di dâ une man al so popul che lu spetave cun fede.

Menâts dal Spirtu Sant a rivárin tal templi chei sants viélis, Simeon e Ane; cu la lûs che il Spirt ur dave, lôr a indivinàrin il Signor e j àn crodût plens di gjonde.

Ancje nô alore, dâts dongje da chel stes Spirtu Sant, anin incuintri a Crist in te cjase di Diu cun chê di cjatâlu e di rivâ adore di cognossilu crevant il so pan, intant ch’o spetìn ch’al torni e che si palêsi une dì plen di glorie.

Po il predi al benedis lis cjandelis cussì:
Prein. Diu, risultive de lûs, che ué tu âs palesât al sant vieli Simeon il Crist, la vere lûs che ducj i popui e spietin, dàur la to benedizion + a chestis cjandelis e scolte la preiere dal to popul che ti ven incuintri cjantant la to laut cun chescj lusors; tégnilu salt pe strade drete, par ch’al rivi adore di cjatâ la lûs che no si distudarà mai-altri.
Tal domandin par Crist nestri Signor. Amen.

o ancje
Diu che tu crèis e tu nus dâs lûs e veretât, cjale cheste to int che si è dade dongje in cheste glesie; e travane + cul sflandor de to santitât chêi ch’a puartin chestis cjandelis, par ch’a rivin adore di jentrâ adimplen te to glorie.
Tal domandin par Crist nestri Signor. Amen.

Al trai l’aghe sante sore lis cjandelis e al invie la purcission disint:
Anin cun gjonde incuintri al Signor!

Te purcission si dà-sú cheste o altre cjante ch’a vadi ben.
Antifone

R. Crist al è la lûs par luminâ i popui
e la glorie pe to int di Israel.

Cjante
Cumò, Signor, lasse lâ il to servidor in pâs
daûr la to peraule;

parceche i miei voi e àn viodût
la to salvece,

chê che tu âs preparade
in face di ducj i popui:

lûs par luminâ i popui
e glorie pe to int di Israel.

Sul finî de purcission si cjante o si dîs il «Glorie a Diu».

Cuant che no si fâs la benedizion des cjandelis e la purcission, si scomence
La Messe

Antifone di jentrade

Signor, nô si visìn che tu âs vût dûl di nô in tal to templi;
ma la to làut, come che tu mertis, e rive fint insom dal mont.
La to man gjestre a jè colme di justissie.

Finît il «Glorie» si dîs:

Oremus: Preìn: Diu onipotent eterno, cjale a di cheste to int che si è dade dongje pe fieste de Presentazion tal templi dal to Fi unic deventât om, e dânus ancje a nô la gracie di podê presentâsi denant di tè dal dut gnûs ta l’anime.
Tal domandin pal nestri Signor Gjesù Crist, to Fi ch’al è Diu, e al vîf e al regne dutune cun tè e cul Spirtu Sant par ducj i secui dai secui. Amen.

Prime leture: Al jentrarà tal so templi il Signor che vualtris o cirîs

Dal libri dal profete Malachie 3, 1-4
Il Signor al dîs cussì:
Vè che jo o mandarài ùn a preparâmi la strade,
e di bot al jentrarà tal so templi il Signor che vualtris o cirîs;
l’agnul dal Pat, che vualtris o spetàis cun passion,
velu. ch’al ven:
lu dîs il Signor, paron dai soldâts.
Cùi le puartaràial-fur, cuanche lui al vegnarà?
Cùi j tegnaràial bot cuan’che si fasarà viodi?
Lui al è come il fûc dal fari
e come la lissìe dai lavandàrs.
Si sentarà par fondi e par smondeâ;
al smondearà i fîs di Levi,
ju fasarà deventâ come l’àur fin e l’arint,
par ch’a presentin al Signor un sacrifici come cu va.
In che volte il Signor al varà agrât l’ufierte di Gjude e di Gjerusalem come ch’al ere par antîc, tas etis di une volte.
Peraule di Diu. Ringrassiin Diu

Salmo cul Responsori 23, 7. 8. 9. 10

R. Il Signor al è lui il rè de glorie. (R.: 8)

Puartis alçàit i vuestris sturz,
puartis eternis, alçàisi,
parcé ch’al à di jentrâ il rè de glorie.

E cui saressial il rè de glorie?
Il Signor, plen di fuarce e di coragjo,
il Signor, ch’al è bon di vinci in vuere.

Puartis, alçàit i vuestris sturz,
puartis eternis, alçàisi,
parcé ch’al à di jentrâ il rè de glorie.

E cui êsal il rè de glorie?
Il Signor dal mont al è lui il rè de glorie.

Seconde leture: Al à scugnût deventâ dal dut compagn dai fradis.

De letare ai Ebreos 2, 14-18
Alore par-vie che i fîs a son ducj di chel stes sanc e di che stesse cjar, ancje Gjesù al è deventât compagn di lôr, par distrugi, midiant de muart, chel ch’al veve il comant de muart, ch’al sares il diaul , e par sfrancjâ ducj chêi che par pore de muart a jerin tignûts sotans par dute la vite.
Cussì a lui nol impuarte nuie dai agnui ma "al impuarte de semence di Abram".
Cussì al à scugnût deventâ dal dut compagn dai fradis, par jessi un grant-predi plen di misericordie e om di peraule tes robis di Diu, cul fin di paiâ i pecjâts dal popul.
Cussì, dopo vê ancje lui patît di persone in te passion, al pò judâ chêi ch’a si cjatin tes provis.
Peraule di Diu. Ringrassiin Diu.

Aleluia Lc. 2, 3 2

Aleluia. I miei voi e àn viodût la to salvece:
lûs par luminâ i popui
e glorie pe to int di Israel. Aleluia.

Vanseli: I miei voi e àn viodût la to salvece.

Dal Vanseli seont Luche 2,22-40
(Si po no lèi ce ch’al è jenfri [ ])
Rivât il timp de purificazion, daûr la leç di Mosé, lu àn puartât a Gjerusalem par ofrîlu al Signor, come ch’al è stât scrit te leç dal Signor: "Ogni mascjo chel vierç la nature al è bandît pal Signor", e ancje par fâ un sacrifissi, daûr ce ch’al è dit te leç dal Signor: un par di tortorelis o doi colombins.
Al ere a Gjerusalem un om di non Simeon. Chest om al jere just e plen di religjon e al spetave la consolazion d’Israel, e il Spirtu Sant al jere cun lui: j veve ansit fat savê, il Spirtu Sant, che nol sares muart cence viodi il Crist dal Signor.
Al capite tal templi, puartât dal Spirt, juste tal moment che i gjenitors a menavin dentri il frutin Gjesù, par fâ ce ch’al jere comandât de leç.
Lui lu cjape tal braç e al benedìs il Signor disint:
«Cumò, Signor, lasse lâ il to servidor in pâs daûr la to peraule;
Parceche i miei voi e àn viodût la to salvece,
chê che tu âs preparade in face di ducj i popui:
lûs par luminâ i popui
e glorie pe to int di Israel.
[ E so pari e so mari a restavin di cè ch’a disèvin di lui.
Simeon ju benedìs e a Marie, so mari, j dîs: «Viôt che chest frutìn al sarà la ruine e la salvece di unevore in Israel, e come un segno di dâj cuintri; e ancje a tì une spade ti passarà l’anime fûr par fûr. Cussì si pandaràn i pinsîrs di unevore di curs».
Ancje Ane, une profetesse, fie di Fanuel, de tribù di Aser, si cjatave lì.
E jere unevore indevant cui agns e cul om e veve vivût dome siet agns dopo sposade.
Restade vedue e rivade a otantecuatri agns, no lassave mai il templi, servint Diu gnot e dì, cun dizuns e preieris.
Capitade juste in chel stes moment, e laudave ancje jê Diu e a fevelave di lui a ducj chêi ch’a spetavin la liberazion di Israel.
Finît ce ch’al jere di fâ daûr la leç dal Signor, a tornin in Galilee; te lor sitât di Nasaret.
Il frutin al cresseve e si rinfuarcive, plen di cjâf, e la gracie di Diu e jere cun lui.]
Vanseli dal Signor. La laude a Ti, o Crist.

Su lis ufiertis

Ve agrât, Diu, i regai de to glesie in gjonde, che par to comant ti presente il sacrifici dal to Fi unic, Agnel cence magle, par che il mont al vivi.
Tal domandin par Crist nestri Signor. Amen.

Prefassi

Al è just, al va ben e al conven ringrassiâti tè simpri e dapardut, Signor, Pari sant, Diu onipotent eterno.
Il to Fi unic, nassût ‘nant di ducj i secui e ué presentât in tal templi, al ven clamât dal Spirtu Sant glorie di Israel e lûs di ducj i popui.
E nô plens di gjonde o lin incuintri al Salvador e cu la samblee dai agnui e dai sants o cjantìn cence polse l’ino de to laude.

Antifone di Cumunion Lc. 2. 30-31

I miei voi e àn viodût la to salvece,
chê che tu âs preparade in face di ducj i popui.

Dopo de Cumunion

Diu, che tu âs contentáde la brame di Simeon che ti spetave, rifinis in nô la vore dal to boncur; Tù che tu j âs dade la gjonde di braçolâ, prin di murî, Crist to Fi, fasinus la gracie che ancje nô, nudrîts cul pan de Eucaristie, o lin incuintri al Signor, cul fin di vê la vite eterne.
Tal domandin par Crist, nestri Signor. Amen.