LA SENSE DAL SIGNOR

Antifone di jentrade Fats 1, 11

Umign di Galilee, parcè stàjso cjalant in cîl?
Come che lu vèis viodût a lâ-sú in cîl,
cussì il Signor al tornarà. Aleluia.

Oremus: Preìn: O Diu, che dut tu puedis, fàsinus gjoldi di sante ligrie, e ringrassiâti cun sante gjonde, parceche la sense di Crist to Fi e jè ancje la nestre, e dulà ch’al è lât-sú lui ch’al è il cjâf, o sperìn di rivâ ancje nô, ch’o sin il cuarp.
Tal domandìn par lui ch’al é Diu e al vîf e al regne dutune cun te e cul Spirtu Sant par ducj i secui dai secui. Amen.

An ABC
Prime leture
Lu àn viodût che si alçave.

Dal libri dai Fats dai apuestui 1, 1-11
Il gno prin libri, cjar Teofilo, al trate di ce che Gjesù al à fat e al à insegnât di cuan’che al à scomençât fint in chel dì ch’al è lât-sú in cîl, dopo vê dât lis sos instruzions ai apuestui ch’al veve sielzût midiant dal Spirtu Sant.
Dopo de so passion lui si è pandût a lôr vîf in tantis manieris, conpariniur par corante dîs e fevelaniur dal ream di Diu. Biel mangjant cun lôr ur à comandât di no slontanâsi di Gjerusalem, ma di spetâ lì ce che il Pari al veve prometût: «Ce che - dissal - o veis sintût de me bocje: Zuan al à batiât cu l’aghe, vualtris invessit o sarèis batiâts cul Spirtu Sant tra pos dîs».
Cjatansi in cunvigne cun lui j àn domandât: «Signor, ástu di tirâ-sú cumó il ream in Israel?
Lui ur rispuint: «No us parten a vualtris di cognossi i tinps e i moments che il Pari al à riservât par sé, ma vualtris o ricevareis la fuarce dal Spirtu Sant ch’al vignarà-jú su di vualtris, e o sareis miei testemonis a Gjerusalem, te Gjudee, te Samarie e fint insomp dal mont».
Disint cussì, sot i lor voi si è alçât par aiar e une nule ur al à strafuît.
Intant che lu cjalavin ch’al lave-sú in cîl, ve’ che si presentin dongje di lôr dôs personis vistudis a blanc, che ur disin: «Umign di Galilee, parcé stàiso cjalant in cîl? Chest Gjesù che us è stât puartât-vie fint in cîl, al tornarà come che lu veis viodût a lâ-sú in cîl».
Peraule dal Signor. Grassie a Diu.

Salmo cul Responsori Sal. 46, 2-3. 6-7. 8-9

R. Il Signor al va-sú tal mieç de ligrie e des sunadis. (R.: 6)
o ancje Aleluia!

Ch’a batin lis mans ducj i popui,
ch’a fâsin fieste al Signor.
Parceche il Signor al è l’Altissin, trement,
il rè di dute la tiere.

Il Signor al va-sú tal mieç de ligrie e des sunadis.
Cjantàit pal nestri rè, cjantàit;
cjantàit pal Signor, cjantàit.

Il Signor al è il rè di dute la tiere, cjantàit come cu va.
Il Signor al è il rè di ducj i popui,
il Signor al è sentât sul so sant trono.

Seconde leture
Ducj insieme o rivìn ‘e unitât de fede.

De letare di Pauli apuestul a chêi di Efeso 4, 1-13
1 Sicheduncje, jo, il presonîr tal Signor, us racomandi di lâ indenant come cu va seont la clamade ch’o vèis vude 2 cence vantos, cun bielfâ, savint spetâ, sopuartansi ùn cul altri tal amor di Diu, 3 cirint di tignî sù l’unitât dal Spirt, cul lâ d’acordo in pâs: 4 un sol cuarp e un sol spirt, come ch’o sèis stâts clamâts a vê une sole sperance, chê de vuestre clamade. 5 Un sol Signor, une sole fede, un sol batîsin. 6 Un sol Diu e Pari di ducj ch’al è sore di ducj, al fâs midiant di ducj e al è in ducj.
7 A ognùn di nô nus è stade dade la gracie seont la misure che Crist al à ulût dânus. 8 Parchel al dîs:
«Lant sù in alt al à fat presonîrs unevore di lôr,
e al à fat regài ai umign».
9 Ma cè vuèlial dî ch’al è lât sù, se prin nol è ancje vignût jù tal bas, su la tiere? 10 Chel ch’al è vignût jù al è sinpri chel ch’al è lât sù, sore dai cii, par dâ la colme a dut.
11 Al è Lui ch’al à fat cualchidun apuestul, altris profetis, altris predicjadors dal Vanseli, altris pastors e mestris,
12 par meti a puest i sants, pal lavor de lor incariche,
par dâ dongje il cuarp di Crist, 13 fintremai che ducj insieme o rivin ‘e unitât de fede, e a cognossi a plen il Fi di Diu, fintremài ch’o rivìn a jessi un omp madûr, a vê la misure de stature interie di Crist,
Peraule di Diu. Grassie a Diu.

Aleluia. Mat. 28, 19. 20

Aleluia. Làit, instruît ducj i popui, dissal il Signor;
jò o soi cun vualtris ogni dì, fint ‘e fin dal mont. Aleluia.

An A
Vanseli
O ài vût ducj i podés in cil e in tiere.

Conclusion dal Vanseli seont Mateo 28, 16-20
In che volte: i undis dissepui a son lâts in Galilee su la mont che ur veve dite Gjesù, e viodinlu lu àn adorât, ma cualchidùn di lôr al à dubitât.
Gjesù al è lât a dîur: «O ài vût ducj i podês in cil e in tiere; cussì làit, instruît ducj i popui e batiâiu tal non dal Pari e dal Fi e dal Spirtu Sant, e insegnâiiur a meti in pratiche dut ce ch’o us ài comandât.
E viodèit che o soi cun vualtris ogni dì fint ‘e fin dal mont».
Vanseli dal Signor. La laut a ti, o Crist!

An B
Vanseli
O ài vût ducj i podés in cil e in tiere.

Conclusion dal Vanseli seont Marc 16, 15-20
15 Ur à dit: «Làit par dut il mont, predicjàit il Vanseli a dutis lis creaturis.
16 Cui ch’al crodarà e al sarà batiât al sarà salf; cùi che nol crodarà al sarà condanât.
17 Chescj a son i meracui ch’a compagnaràn chêi ch’a crodin: in tal gno Non a pararàn fûr demonis, a fevelaràn lenghis gnovis, 18 a cjaparàn in man sarpints, a bevaràn velens e no ur fasaràn mâl, a metaràn lis mans sui malâts e a vuariràn.»
19 Alore il Signor Gjesù, dopo di vèur fevelât, al è stat puartât su in cîl e si è sentât ‘e gjestre di Diu. 20 Lôr a son lâts, e àn predicjât par dut cul jutori dal Signor e rinfuarçant la peraule cui meracui ch’a fasevin.
Vanseli dal Signor. La laut a ti, o Crist!

An C

Dal Vanseli seont Luche 24, 46-53
In che volte Gjesù al à dite ai siei dissepui: Cussì al è scrit:46 «il Crist al à di patî e di tornâ a vivi dopo muart te tierce dì, 47 e che si à tal so Non di predicjâ a ducj i popui ch’a si mendin par vê il perdon dai pecjâts scomençant di Gjerusalem.
48 Vualtris o sèis testimonis di chestis robis. E vè che jo us mandarai ce ch’al à prometût gno Pari. 49 Restàit in sitât fin ch’o sintarèis intorsi une fuarce che ven dal alt».
50 Po, ju mene fûr des bandis di Betanie e alçant lis mans ju benedìs. 51 E, intant che ju benedive si è slontanât di lôr e al vignive puartât su in cîl.
52 Lôr si son butâts par tiere denant di lui, e po a son tornâts a Gjerusalem plens di gjonde. 53 E a jerin simpri tal templi ch’a laudavin Diu..
Vanseli dal Signor. La laut a ti, o Crist!

Su lis ufiertis

Signor, o ti presentìn chest sacrifici pe sante sense dal to Fî, preanti che tu nus fasis la gracie che, cul ufrîti nô e cul concedi tú, o podín insieme cun lui cjatâsi in cîl.
Tal domandìn par Crist nestri Signor. Amen!

Antifone di Cumunion Mat. 28, 20

Viodèit che Jo o soi cun vualtris ogni dì,
fint ‘e fin dal mont. Aleluia.

Dopo de Cumunion

O Diu onipotent e plen di boncur, che tu nus lassis doprâ lis robis tôs ancje s’o sin caiù su la tiare, ti preìn di dânus la gracie che la religjon cristiane ch’o vín tal cur nus dreci a lâ dulà che cumò e jè la nestre umanitât dutune cun te.
Tal domandín par Crist nestri Signor. Amen!