DOMENIE DI PENTECOSTIS
Fieste grande

Antifone di jentrade

Il Spirt dal Signor al à jemplât dut il mont,
e Lui, ch’al ten-sú dut, al sa dutis lis lenghis. Aleluia.

o ancje Rom. 5, 5; 10, 11
L’amor di Diu al è stât semenât tai nestris curs midiant dal so Spirt,
ch’al à fat di nô la so cjase. Aleluia.

Oremus: Preìn: O Diu che cul misteri de fieste di Pentecostis tu santifichis dute la to Glesie fate di int di ogni rasse e di ogni color, semene i regai dal Spirtu Sant in ducj i cjantons dal mont, e ce che tu ti sês indegnât di fâ cuant che àn scomençât a predicjâ il Vanseli, fasilu ancje cumò tai curs di chêi ch’a crodin.
Tal domandin par Gjesù Crist nestri Signor e to Fi ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

Prime leture: A son stâts ducj jemplâts di Spirtu Sant e a jan scomençât a fevelâ.

Dal libri dai Fats dai apuestui 2, 1-11
Sul cricá de fieste di Pentecostis ducj a jerin adun tal stes puest. Tun colp al rive dal cîl un sunsûr come di un aiaròn, ch’al jemple dute la cjase dulà ch’a stavin in compagnie.
Po ur comparissin come tantis lenghis di fuc, ch’a van a poiâsi a une a une sul cjâf di ognidun di lôr. ducj a restin incolms di Spirtu Sant e a scomencin a fevelâ lenghis diferentis, seont che il Spirtu Sant ju faseve fevelâ.
Tra i Gjudeos ch’a stavin a Gjerusalem, si cjatavin oms di religjon di ogni gjernassie ch’a esíst sot il soreli.
Sintût duncje chel sunsûr si è dade dongje une trope di int che jè restade scaturide, parceche ognidun ju sintive a fevelâ te so lenghe. A jerin instupidîts e, fur di sè, a disevin: Ma cjale po! Chescj achì che fevelin, no sono ducj Galileos? Cemût êse che ognidun di nô ju sintìn fevelâ te nestre marilenghe? O sin Parz, Medos, Elamiz e int de Mesopotamie, de Gjudee e de Capadossie, dal Pont e de Asie, de Frigie e de Panfilie, dal Egjit e dai paîs de Libie dulintor di Cirene, Romans vignûts chenti, Gjudeos e forescj ch’a crodin, Cretês e Arabos e ju vin sintûts a fevelâ des grandis robis di Diu tes nestris lenghis.
Peraule di Diu. Grassie a Diu.

Salmo cul Responsori Sal. 103, lab e 24ac. 29bc-30. 31 e 34

R. Mande il to Spirt, Signor, e fâs gnove cree la face de tiere.
o ancje Aleluia!

Anime mê, benedìs il Signor.
Signor, Diu gno, tu sês propit grant.
Ce tantis robis che tu âs fatis,
Signor, cun lôr tu âs jemplade dute la tiere.

Se tu ur tiris indaur il to Spirt, a murin
e a tornin pantan come ch’a erin.
Se tu mandis il to Spirt, a vivin
e tu fasis gnove cree la face de tiere.

Glorie al Signor par simpri,
e che si cjati content di ce ch’al à fat.
Ch’al vebi agrât ce ch’o cjanti
e jo o sarài legri e content.

Seconde leture: Ducj nô ch’o vin un sol Spirt o sin stâts batiâts par jessi un sol cuarp.

De letare di Pauli apuestul a chêi de Galassie. 5, 16-25
16 Alore jo us dîs: làit indenant cul Spirt e cussì no sacearèis lis vois de cjar.
17 Parceche la cjar e à vois contraris a chês dal Spirt, e il Spirt lis à contrariis a chês de cjar: a son robis une cuintri chealtre, par ch’o capîs che no veis di fâ ce ch’o olèis. 18 S’o si lassais menâ dal Spirt no seis plui sot de Leç.
19 Lis oparis, po, de cjar a son cognossudis; alvenastai: porcariis, robatis, lasaronadis, 20 idolatrie, striaments, odios, barufis, gjelosiis, rabiis, partits, cuistions, lotis, 21 invidiis, cjochis, fiestins e robis compagnis di chestis; poben, us al dîs prime, come ch’o us al ài za dite, chêi ch’a lis fâsin no cuistaran il regno di Diu.
22 Il Spirt invessit al prodûs amor di Diu, gjonde, pâs, al slargje il cur, gjentilece, bon cûr, fedeltât, cur dolç, misure: 23 cuintri di robis come chestis no jè leç che tegni.
24 Chêi di Crist Gjesù a jàn metude in crôs la cjar cu lis sos passions e lis sos vois.
25 S’o vivin di Spirt anin ancje daur dal Spirt. No stin a cirî vantos cence costrùt, no stin a stiçâsi un cul altri, no stin a invidiâsi un cul altri.
Peraule dal Signor. Grassie a Diu.

Secuense