Domenie 34 vie pal an
ultime vie pal an
FIESTE DI NESTRI SIGNOR GJESU CRIST,
RÉ DAL MONT

Antifone di jentrade Ap. 5, 12; 1.6

L’agnel ch’al è stat copât al merte di vê potence, divinitât, sapiense, fuarce e onôr.
Glorie e comant a lui par dutis lis etis.

Oremus. Preìn: Diu onipotent eterno, che tu âs olût dut midiant il to cjar Fi, rè di dut il mont, fâs, par plasé, che dutis lis creaturis, sfrancjadis de sclavitût, a vêbin simpri di servî la to paronance e laudâti cence mai finî.
Tal domandin par lui ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

An A

Prime leture: Sul cont di vualtris ch’o seis il gno trop o judicarai piore par piore.

Dal libri dal profete Ezechiel 34,11-12. 15-17
Diu il Signor al dîs: «Viodèit che jo o domandarài des mes pioris; lis cirarài. Come il pastor ch’al conte il so trop, cuant che j mancje cualchidune, cussì ancje jo o cirarài lis mes pioris e lis salvarài; ch’a sèin ladis là ch’a vuelin in tune dì di ploe o di fumate. Jo o menarai a passon lis mes pioris e o lis fasarài polsâ, dissal il Signor.
O cirarài chê pierdude, o puartarài dongje chê fur di trop, o fassarài chê che si è fate mâl e o tirarài-sú chê malade; invessi chê grasse e in bon stât la coparài. Lis menarài a passon come cu va.»
Sul cont di vualtris ch’o seis lis mes pioris, il Signor al dîs: «Viodèit ch’o judichi une par une, ch’o fâs diference fra becs e cjastrons».
Peraule di Diu. Ringrassiin Diu!.

Salmo cul Responsori Sal. 22, 1-2a. 2b-3. 5-6

R. Il Signor al è il gno pastor e a mi no mi mancje nuie. (R.: 1)

Il Signor al è il gno pastor
e a mi no mi mancje nuie!
mi à menât tal mieç di prats verts,
là ch’a son aghis buinis,
al à tirade-sú la me anime;
mi mene cul so Non pe strade juste. (R.: 1)

Ancje s’o ves di passâ pes foronatis plui scuris
no vares pore di nuie,
parceche tù tu sês cun mè.
Le to uiscje e il to baston mi fâsin stâ sigûr. (R.: 1)

Tu mi âs preparade une taule
in muse di chêi che mi son contraris;
tu mi ongis di bonodor il gno cjaf,
e la me tace a jè plene che spant. (R.: 1)

Sì, la to bontât e il to bonolé mi corin daûr,
ducj i dîs de me vite,
o vivarài te cjase dal Signor
par unevore di agn. (R.: 1)

Seconde leture
Al consegnarà il ream tes mans dal Pari, par che Diu al sèi dut in ducj.

De prime letare di Pauli apuestul a chêi di Corint. 15, 20-26a. 28
Fradis: Crist al è rissussitât dopo muart, prime flor dai muarts. Parceche midiant di un om e jè la muart e midiant di un om e jè ancje la rissurezion dai muarts; e come in Adam ducj a muerin, cussì ducj in Crist a saràn fats vivi.
Ma ognun tal so puest: prin di ducj Crist, dopo chêi di Crist cuant che lui al tornarà, e po la fin, cuant ch’al consegnarà il regno tes mans di Diu e Pari, cuant ch’al varà ridot a nuie ducj i protos, dutis lis potencis, dutis lis fuarcis. Parceche lui al à di fâ di rè «fin ch’al è rivât adore di meti sot i pîs ducj i siei nimîs. L’ultin nimî a jessi fat-fur e sarà la muart. Cuant, po, dut al sarà metût sot di lui, alore ancje il fi in persone si plearà denant di chel ch’al à metût dut sot di lui, par che Diu al sèi dut in ducj.
Peraule di Diu. Ringrassiin Diu!.

Aleluia Mc. 11, 10

Aleluia. Benedet chel ch’al ven tal non dal Signor:
benedet il regno dal pari nestri Davit ch’al sta rivant. Aleluia.

Vanseli: Si sentarà tun trono di glorie e ju dividarà ùn dal altri.

Dal Vanseli seont Mateo 25, 31-46
Alore: al à dite Gjesù ai siei dissepui: «Cuant che il Fi dal om al vignarà te so glorie e ducj i agnui a saràn cun lui, inchevolte si sentarà tun trono di glorie. Dute la int e sarà tirade dongje denant di lui e lui ju dividarà ùn dal altri, come il pastor ch’al divît lis pioris dai cjastrons, e al metarà lis pioris ‘e so gjestre e i cjastrons a çampe».
Alore il rè al disarà a chêi de so gjestre: "Benedets di gno Pari, vignît a cjapâ possès dal regno preparât par vualtris de fondazion dal mont in cà. Parcech’o ài vude fan e o mi vèis dât di mangjâ, o ài vude sêt e o mi vèis dât di bevi; o jeri par strade e o mi veis dât un sotet, o jeri nût e o mi vèis vistût, o jeri malât e o vèis viodût di mè, o jeri in preson e o sèis stâts a cjatâmi".
I juscj alore j rispuindaràn: "Signor, cuant ti vîno viodût plen di fan e ti vîno dât di mangjâ, o plen di sêt e ti vîno dât di bevi?
Cuant ti vîno viodût par strade e ti vîno dat un sotet, o nût e ti vîno vistût?
Cuant ti vîno viodût malât o in preson e sîno vignûts dongjiti?"
E il rè ur rispnindarà: "Us al dîs pardabon: ce ch’o vèis fat a un sôl di chescj fradis miei, dai ultims, lu vèis fat a mi".
Alore al disarà ancje a di chêi a çampe: «Làimi lontans dai voi, maladets, tal fuc eterno, preparât pal diaul e pai siei agnui; parcech’o ài vude fan e no mi vèis dât di mangjâ, o ai vude sêt e no mi vèis dât di bevi, o jeri par strade e no mi vèis dât un sotet, nût e no mi vèis vistût, malât e in preson e no sèis stâts a cjatâmi".
Alore j rispuindaràn ancje lôr: "Signor, cuant ti vîno viodût plen di fan o plen di sêt, par strade o nût, malât o in preson e no ti vîno servît?"
Ur rispuindarà: "Us al dîs paradabon: dut ce che no vèis fat a un sôl di chescj, dai ultims, no lu vèis fat a mi.
Lôr a laran tun cjastic eterno, i juscj invessit t'une vite eterne.»
Vanseli dal Signor. Le laut a tì, o Crist!

An B

Prime leture: Il so podè nol molarà mai.

Dal libri dal profete Danel 7,13-14
O stavi viodint in sium: ve' che su lis nulis dal cil al vignive indenant ùn ch'al sameave fi di om: al è rivât fin là dal Vecjo e j al àn presentât. Al à vût podè, vistits di rè e ream, e ducj i popui, dutis lis gjernassiis e dutis lis lenghis j stavin-sot.
Il so podè al è eterno, nol molarà mai, e il so ream nol colarà mai.
Peraule di Diu. Ringrassiin Diu!

Salmo cul Responsori Sal. 92, 1ab. 1c-2. 5

R. Il Signor al fâs di rè. (R.: 1 a)

Il Signor al fâs di rè, il Signor si è vistût di rè,
il Signor al à metût intorsi i vistits dal podè.

Al à fatis lis fondis siguris 'e tiare: no colarà mai.
Il to trono al è plantât di simpri in cà: tù tu sês simpri stât.

Ce che tu insegnis al è propit ver,
il to santuari al è sant par in secula, Signor,

Seconde leture: Sorestant dai rès di chest monf: nus à fats rès e predis par Diu.

Dal libri de Apocalisse di Zuan apuestul 1 5-8
Gjesù Crist al è il testemoni fedel,
il prin rissussitât dai muarts
e il princip dai rès de tiare.
A lui, che nus ûl ben,
ch'al à lavât i nestris pecjâts tal so sanc
e al à fat di nô ancje tancj rès e predis par Diu so Pari,
a lui glorie e comant par dute l'eternitât. Amen.
Vèlu mo, ch'al ven parsore lis nulis!
Lu viodaran i voi di ducj,
ancje di chêi che lu án ufindût.
Dutis lis gjernassiis de tiare si bataran il stomi par-vie di lui.
Pardabon. Amen. io o soi "alfa" e "omega", al dîs Diu il Signor, il principi e la fin; l'onipotent ch'al è, ch'al ere e ch'al à di vignî.
Peraule di Diu. Ringrassiin Diu!

Aleluia: Mc. 21 , 10

Aleluia. Benedet chel ch'al ven tal non dal Signor:
benedet il regno dal pari nestri Davit, ch'al sta rivant. Aleluia.

Vanseli: Propit tu lu dîsis: Jo o soi rè.

Dal Vanseli seont Zuan 18, 33b-37
Alore Pilato al jentre dentri tal pretori, al clame Gjesù e lu interpele: «Tù séstu il rè dai Gjudeos?».
Gjesù al rispuint: «Lu distu di cjâf tô o t'al âial dit cualchidun altri? ».
E Pilato: «Crodistu ch'o sèi un gjudeo? Le to int e i sorestants dai predis ti àn metût tes mes mans: ce âstu fat?».
Gjesù al rispuint: «Il gno regno nol è di chest mont; se il gno regno al fos di chest mont, i miei seguaz a varessin scombatût par che jo no finìs tes mans dai Gjudeos; ma il gno regno nol è di chenti».
Alore Pilato j dîs: «Duncje, sêstu rè?».
E Gjesù: «O soi rè, tu dîsis propit just. Par chel o soi nâassût, e o soi vignût in chest mont, par predicjâ la veretât:
ducj chêi ch'e son de bande de veretât a scoltin le me vôs».
Vanseli dal Signor. Le laut a tì, o Crist!

An C
Prime leture: E àn onzût rè Davit par Israel.

Dal secont libri di Samuel 5,1-3
Inalore dutis lis tribús di Israel a son ladis a Ebron là di Davit a dîsj: «Viôt che nô o sin int de to cjar e dai tiei vuès. Ancjemò prin, cuant ch'al ere re Saul, tu jeris tù che tu regevis Israel tal lâ e tal tornâ. Il Signor ti à dit: Tu sarâs tù il pastor di Israel, tù tu sarâs il so sorestant». Duncje a rivàrin ducj i caporions di Israel in Ebron là dal rè, e il rè Davit al è lât in cunvigne cun lôr in Ebron in face dal Signor, e lôr e àn onzût Davit rè par Israel.
Peraule di Diu. Ringrassiin Diu.

Salmo cul Responsori: SaL 121, 1-2. 3-4a. 4b-5

R. Ce ligrie, cuant che mi à dite: o lin te cjase dal Signor. (R.: 1)

Ce ligrie, cuant che mi àn dite:
O lin te cjase dal Signor.
E cumò i nestris pîs
a son sot des tos puartis Gjerusalem.

Che Gjerusalem ch'e jè stade ben fate
come une sitât che si plante ben;
dulà che lis tribús, chês dal Signor,
a van-sú, daûr la leç ch'al à vût Israel,
a laudâ il non dal Signor.,

Parceche lassú al è il trono de justíssie,
il trono de famee di Davit.
Bramàit la pâs a Gjerusalem:
Ch'a sèin cence poris chêi che ti uelin ben.

Seconde leture: Nus à plantâts tal ream di so Fi, il parferît.

De letare di Pauli apuestul a chêi di Colossi 1,12-20
Fradis: ringrassiîn legris Diu Pari, ch'al è stât bon di fâ cjapâ part ancje nô de furtune dai sants in te lûs. Al è lui che nus à tirâts-fur des grifis dal scur e nus a sistemâts in tal regno dal Fi dal so amor, ch'al è midiant di lui ch'o vin la redensie, il perdon dai pecjâts.
Lui al è il litrat di Diu che no si viôt, nassût prin di dute la creazion,
parceche al è stat creât dut midiant di lui, sèi in tai cî che su la tiare, ce che si viôt e ce che no si viôt, tant i tronos che i sorestants, tant i prins che lis potensis: dut al è stât creât midiant di lui e par lui. E lui al è il prin di dutis lis robis e dutis lis robis a stan-sú midiant di lui, e al è lui il cjâf dal cuarp, al ven a stai de glesie: lui al è il prin, ancje il prin rissurît dai muarts, par ch'al fos il prin lui in dut e pardut; parceche al à plasût (a Diu) di plantâ in lui la colme di dut, e, midiant di lui, di tornâ a meti dacordo cun sé dutis lis robis, fasint la pâs, midiant dal sanc de so crôs, cul cil e cu la tiare.
Peraule di Diu. Ringrassiin Diu.

Aleluia: Mc. 11, 10

Aleluia. Benedet chel ch'al ven tal non dal Signor:
Benedet il regno dal pari nestri Davit, ch'al sta rivant. Aleluia.

Vanseli: Signor, visiti di me cuant che tu jentrarâs tal to regno.

Dal Vanseli seont Luche 23,35-43
Alore il popul al stave a cjalâ. I caporions a sberlavin cuntri di Gjesù disint:«Al à salvât chêi altris; che si salvi lui cumò, s'al è il Crist di Diu, il sielt!».
Ancje j soldâts lu cjolevin-vie, lant a dâj asêt e disint: «Se tu sês il rè dai Gjudeos, sàlviti!».
Sore di lui el ere scrit par grec, par latin e par ebraic: «Chest al è il rè dai Gjudeos».
Un di chei ladrons ch'a jerin in crôs j blestemave disint: «No séstu il Crist? Salve te e nô».
Ma chelaltri al cjape la peraule par fâlu tasê e j dîs: «No ástu timor di Diu nancje tú che tu âs vude la sentense compagne? Parceche par nô nuie ce dî; o cjapin just ce ch'o vin fat; ma lui nol à fat nuie fur di puest».
E al diseve: «Gjesù, visiti di me cuant che tu tornarâs tal to regno».
E lui: «O tal garantis che ué tu sarâs cun me in paradîs».
Vanseli dal Signor. Le laude a Ti, o Crist.

Su lis ufiertis

Signor, midiant l'ufierte di cheste vitime che nus ricuarde la pâs che tu âs fat cun nô, a schene plete ti preìn di dânus a ducj la gracie di vivi in pâs e dacordo.
Tal domandin par Crist nestri Signor. Amen.


Prefassi

V. Il Signor cun vualtris. R. E ancje cun te.
V. I nestris curs adalt. R. Ju vin arcâts pal Signor.
V. Ringrassiin il Signor nestri Diu. R. Al è just e al va ben.

Al è just, al va ben e al conven ringrassiâti te, simpri e dapardut, Signor, Pari, Diu onipotent eterno. Cul to ueli tu âs consacrât predi par simpri e rè di dut il mont il to unic Fi, Gjesù Crist nestri Signor, par che lui, sacrificansi sul altar de crôs, vitime cence magle pe pâs di ducj, al rifinis la vore de nestre redensie e, deventât paron di dut, al consegnas 'e to maestât divine il ream eterno su dut: ream di veretât e di vite, di santitât e di gracie, di justissie, d'amor e di pâs.
Parchel mo, cui agnui e cui arcagnui, cui tronos e cu lis dominazions e cun ogni sorte di potensis dal cil, nô ti cjantin, cence fermâ, l'ino di glorie.
Sant, sant, sant, al è il Signor, Diu di dut il mont.
I cî e la tiare a son plens incolms de to glorie.
Osana adalt tai cî!
Benedet sèial cui ch'al ven tal non dal Signor,
Osana adalt tai cî!

Antifone di Cumunion Sal. 28, 10-11

I1 Signor al è re sul trono eterno;
al benedis il so popul cu la pâs.

Dopo de Cumunion

Signor, vin gioldût chest past de vite che no mûr, fâs, ti preìn, che chêi che si tegnin in bon di ubidî ai comandaments di Crist, rè di dut, a vêbin di podê cun lui vivi par simpri.
Tal domandin par Crist nestri Signor. Amen!