FIESTE DAL BATÎSIN DAL SIGNOR

Antifone di jentrade Cf. Mt. 3, 16-17

Il Signor al jere juste batiât che i cî a si son vierzûts
e il Spirt si è poiât su di lui come une colombe
e la vôs dal Pari, come chê di un ton, e à dit:
"Chest al è il gno Fi predilet,
o soi tant content di lui".

Oremus: Preìn: O Diu che tu sês simpri e che dut tu puedis e che tu âs dit ad alte vôs che Crist, batiât ta l’aghe dal Gjordan, intant che il Spirtu Sant si sbassave su di lui, al ere il to Fi che tu j olevis tant ben, fâs la gracie ai fîs che tu âs adotâts e fats tornâ a nassi cu l’aghe e cul Spirtu Sant, ch’a restin simpri salts tal fati content.
Tal domandin par Gjesù Crist nestri Signor e to Fi ch’al è Diu e al vîf e al regne dutune cun te e cul Spirtu Sant par ducj i secui dai secui. Amen.

O ancje:

Oremus: Preìn: O Diu, il to Fi unic si è pandût cul nestri cuarp di umign, fasinus par plasé la gracie, dopo vêlu cognossût pardabon Om come nô, di deventâ compàins di Lui te anime.
Tal domandin midiant di Lui ch’al vîf e al regne dutune cun Te e cul Spirtu Sant par ducj i secui dai secui. Amen.

An A
Prime leture
Vè chi il gno servidor ch’al fâs content il gno cûr.

Dal libri dal profete Isaie 42, 1-4. 6.
Il Signor al dîs cussì:
Vè chì il gno servidor che Jo o ten-sú, ch’o ài sielt, ch’o j ûl ben e ch’o j ài dât il gno spirt, par ch’al slargji la justissie a ducj i popui. Nol berle, nol alce la vos, no si fâs sintî par strade. Nol creve nancje une cjane rote, nol distude un pavêr ch’al vîf e al mur. Al fâs cognossi la justissie cemût ch’e jè. Nol sarà flop e clopadìç, ansit al plantarà salde la justissie su la tiare e lis isulis lontanis a varan gole di ce che lui al insegne.
Jo, il Signor ch’o ti ài clamât seont justissie, ti ài cjapât pe man e ti ài poleât; o ài fat di te il segno de amicissie cul gno popul, un lampion pai forescj, par che tu rivis adore di viergi i voi ai vuarps, di tirâ-fur de pereson chêi ch’a son incjadenâts, di spalancâ lis puartis a chêi ch’a son sierâts tal scûr.
Peraule di Diu. Ringrassiin Diu.

Salmo cul Responsori Sal. 28, la e 2. 3ac-4. 3b e 9b-10

R. Il Signor al benedis il so popul cu la pâs. (R.: llb)

Fîs di Diu, batèit lis mans al Signor,
batèit lis mans ‘e glorie e a la fuarce dal Signor!
Batèit lis mans al non dal Signor,
adoràilu cun dute la solenitât!

La vos dal Signor e jè plui fuarte di chê des aghis
la grandece di Diu e fâs sintî il so ton.
La vôs dal Signor e jè potente,
la vôs dal Signor e jè un spetacul!

Il Signor al discjadene il burlàç.
Tal so templi ducj a dîsin: viva.
Il Singor al è sentât plui ad alt des aghis,
il Signor al è rè sul trono eterno.

Seconde leture.
Il Signor lu à onzût cul Spirtu Sant.

Dal libri dai Fats dai apuestui 10, 34-38
Alore Pieri al cjape la peraule e al dîs: O viôt pardabon che Diu nol fas parsialitâts cun nissun, ma al à agrât chel ch’al à timor di Diu e al met in pratiche la justissie, di cualunche gjarnassie ch’al sèi.
Lui al à inviade la so Peraule ai fîs d’Israel puartàniur la buine gnove de pâs par mieç di Gjesù Crist, ch’al è il Signor di ducj. Vualtris o savèis ce ch’al è sucedût par dute la Gjudee, scomençant de Galilee, dopo il batìsin che al à predicjât Zuan, ven a stai che Diu al à onzût di Spirtu Sant e di potense Gjesù chel di Nasaret, che al à girât atôr, fasint dal ben e vuarint ducj i paronâts dal diaul, parceche Diu al ere cun lui.
Peraule di Diu. Ringrassiin Diu.

Aleluia Cf. Mc. 9, 6

Aleluia. I cî si son vierzûts e a jè vignude-fur la vôs dal Pari:
«Chest al è il gno Fi predilet: scoltàilu». Aleluia.

Vanseli
Gjesù dopo batiât al à viodût il Spirt di Diu che si sbassave su di lui.

Dal Vanseli seont Mateo 3, 13-17
In che dì: ancje Gjesù, ch’al vignive de Galilee, al capite sul Gjordan, là di Zuan, par fâsi batiâ. Ma Zuan nol oleve, par-vie ch’al rasonave: «Jo o ài bisugne che tu mi batîs Tù e Tù tu vegnis a cirîmi me?».
Ma Gjesù j rispuint: «Par cumò lasse, parceche nus conven fâ dut ce ch’al va fat».
Alore lu à lassât.
Gjesù, apene batiât, al salte-fur da l’aghe e alore il cîl si vierç e al viôt il spirt di Diu a vignî jú come une colombe e a rivâ sore di lui e ancje une vôs dal cîl che diseve: «Chest chì al è il gno Fi predilet, o soi tant content di lui».
Vanseli dal Signor. La Laut a ti, o Crist!


An B
Prime leture
A TAULE CUL SIGNÔR

Dal libri dal profete Isaie 55,1-11
1 Ducj vualtris ch’o seis plens di sêt,
vegnît cà de aghe,
ancje chel ch’al è cence bêz!
vegnît, urît e mangjàit:
vegnît e urît cence bêz vin e lat!
2 Parcé spindi bêz cence vê ce mangjâ?
parcé dâ-vie la vuestre pàe
cence rivâ adore di saceâsi?
Scoltàimi Me e o mangjarèis robe buine;
o cjerçareis la mior robe ch’e sèi.
3 Dreçàit lis orelis e vegnît cà di Me,
scoltàimi e o vivarèis!
Jo o fasarài un pat par in secula cun vualtris
e us darài i plasês ch’a durin,
ch’o ài impromitûts a Davit.
4 Viôt ch’o ti fasarài deventâ un testemoni pai forescj,
un sorestant e un menador pai popui.
5 Viôt che tu clamarâs int che no tu cognossevis,
int che no ti cognossevin ti vegnarà dapruf,
in gracie dal Signor, to Diu, e dal Sant di Israel,
che ti jemple di glorie.

6 Cirît il Signor cuant che si lu pò cjatâ,
clamàilu cuant ch’al è dongje.
7 Il trist al à di lassâ la so strade,
l’omp ch’al fâs mâl al à di lassâ lis sos tristeriis
e tornâ là dal Signor
ch’al varà dûl di lui,
là dal vuestri Diu
ch’al è pront a perdonâ.
8 «Sigûr che lis mes ideis no son lis vuestris,
e lis vuestris stradis no son lis mês!
– dissal il Signor –.
9 Anzit lis mes stradis a son plui altis des vuestris
tan’che i cî a son plui alts de tiare,
e compagn lis mes ideis in confront des vuestris».

- LA PERAULE DI DIU NO JÈ MAI DIBANT

10 Come la plòe e la nêf a vegnin jú dal cil
e no tornin indaûr cence vê imbombade la tiare,
cence vele fate lâ in amôr e dâ fûr
e cence vele fate fâ la semence pal semenador
e fat fâ il pan par chel che lu à di mangjâ,
11 cussì al sarà ancje de me peraule:
no torne indaûr là di Me cence vê fat nuie,
ma e fâs ce ch’o uèi Jo,
e fâs ce ch’o le ài mandade a fâ.
Peraule di Diu. Ringrassiin Diu.

Salmo cul Responsori Isaie 12,1-6

R. GRASSIE, SIGNOR

1In che dì tu disarâs:
«Ti ài agrât, Signor,
parceche dopo jessi stât rabeât cun me,
tu ti sês calmât e tu mi âs consolât.

2 Viodèit che il Signor al è il Diu che mi salve;
mi fidi di Lui, e no ài pore di nuie;
parceche il Signor al è la me crete,
chel ch’al merte ch’o lu cjanti:

Lui al è stât la me salvece!
3 O urirèis l’aghe plens di gjonde,
des risultivis de salvece».

4 E in che dì o disarèis:
«Vèit agrât al Signor,
clamàit in jutori il so Non,
fasèit cognossi ai popui lis maraveis ch’al à fatis,
no stàit a dismenteâ che il so Non al è grant».

5 Fasèit un cjant al Signor
parcé ch’al à fatis robis grandis
e dut il mont lu sa.

6 Gjolt e cjante, int di Síon,
parceche al è grant là di tè,
il "Sant di Israel".


Seconde leture.
LA FEDE E VINC IL MONT

De prime letare di Zuan apuestul 5,1-9
1 Ognidun ch’al crôt che Gjesù al è il Crist, al è gjenerât di Diu; e chel ch’al ûl ben al gjenitor al ûl ben ancje a chel ch’al è nassût dal gjenitor.
2 Nô o cognossin di olê ben ai fîs di Diu in chest fat: se o amin Diu e se osservin i siei comandaments. 3 Parceche l’amor di Diu al è propit chest: Tignî cont dai siei comandaments.
4 I siei comandaments no son pesants, parceche dut ce ch’al nas di Diu al vinç il mont, e cheste vitorie sul mont e jè la nestre fede.

CRIST FI DI DIU
5 Cui èsal duncje il vincidor dal mont se no chel ch’al crôt che Gjesù al è il Fi di Diu? 6 Lui, Gjesù Crist, al è chel vignût par mieç da l’aghe e dal sanc; e no dome par mieç da l’aghe, ma ancje dal sanc. E al è il Spirt ch’al fâs testemoneance, parvie che il Spirt al è veretât.
7 A son tre, alore, ch’a testemonèin: 8 il Spirt; l’aghe e il sanc, e chesc’ tre a son dutune.
9 Nô o fasin buine la testemoneance dai umign; poben chê di Diu e jè plui grande!
La testemoneance di Diu e jè cheste: di vê deponût a riuart di so Fi!
Peraule di Diu. Ringrassiin Diu.

Aleluia Cf. Mc. 9, 6

Aleluia. I cî si son vierzûts e a jè vignude-fur la vôs dal Pari:
«Chest al è il gno Fi predilet: scoltàilu». Aleluia.

Vanseli
Tù tu sês il gno fi cjar, o soi tant content di te.

Dal Vanseli seont Marc 1, 6b-11
In che volte Zuan predicjant al diseve:
«Al sta rivant chel plui fuart di me dopo di me,
e jo no soi degn nancje di pleâmi par dispeâ la corèe dai siei sandui.
Jo us ài batiâts ta l'aghe,
lui us batiarà tal Spirtu Sant».
Al sucêt alore che Gjesù, vignût di Nasaret de Galilèe, si fâs batiâ di Zuan tal Gjordan e, cuant ch'al salte-fur da l'aghe, al viôt il cil che si vierç e il Spirt, come une colombe che si sbasse sore di lui e une vôs 'e rive dal cil:
«Tù tu sês il gno fi cjar, o soi tant content di tè».
Vanseli dal Signor. La Laut a ti, o Crist!


An C
Prime leture
Vè chi il gno servidor ch’al fâs content il gno cûr.

Dal libri dal profete Isaie 42, 1-4. 6.
Il Signor al dîs cussì: Vè chì il gno servidor che Jo o ten-sú, ch’o ài sielt, ch’o j ûl ben e ch’o j ài dât il gno spirt, par ch’al slargji la justissie a ducj i popui.
Nol berle, nol alce la vôs, no si fâs sintî par strade.
Nol creve nancje une cjane rote, nol distude un pavêr ch’al vîf e al mur.
Al fâs cognossi la justissie cemût ch’e jè.
Nol sarà flop e clopadìç, ansit al plantarà salde la justissie su la tiare e lis isulis lontanis a varan gole di ce che lui al insegne.
Jo, il Signor ch’o ti ài clamât seont justissie, ti ài cjapât pe man e ti ài poleât;
o ài fat di te il segno de amicissie cul gno popul,
un lampion pai forescj, par che tu rivis adore di viergi i voi ai vuarps,
di tirâ-fur de pereson chêi ch’a son incjadenâts,
di spalancâ lis puartis a chêi ch’a son sierâts tal scûr.
Peraule di Diu. Ringrassiin Diu.

Salmo cul Responsori Sal. 28, la e 2. 3ac-4. 3b e 9b-10

R. Il Signor al benedis il so popul cu la pâs. (R.: llb)

Fîs di Diu, batèit lis mans al Signor,
batèit lis mans ‘e glorie e a la fuarce dal Signor!
Batèit lis mans al non dal Signor,
adoràilu cun dute la solenitât!

La vôs dal Signor e jè plui fuarte di chê des aghis
la grandece di Diu e fâs sintî il so ton.
La vôs dal Signor e jè potente,
la vôs dal Signor e jè un spetacul!

Il Signor al discjadene il burlàç.
Tal so templi ducj a disin: viva.
Il Singor al è sentât plui ad alt des aghis,
il Signor al è rè sul trono eterno.

Seconde leture.
Il Signor lu à onzût cul Spirtu Sant.

Dal libri dai Fats dai apuestui 10, 34-38
Alore Pieri al cjape la peraule e al dîs: O viôt pardabon che Diu nol fâs parsialitâts cun nissun, ma al à agrât chel ch’al à timor di Diu e al met in pratiche la justissie, di cualunche gjarnassie ch’al sèi.
Lui al à inviade la so Peraule ai fîs d’Israel puartàniur la buine gnove de pâs par mieç di Gjesù Crist, ch’al è il Signor di ducj.
Vualtris o savèis ce ch’al è sucedût par dute la Gjudee, scomençant de Galilee, dopo il batìsin che al à predicjât Zuan, ven a stai che Diu al à onzût di Spirtu Sant e di potense Gjesù, chel di Nasaret, che al à girât atôr, fasint dal ben e vuarint ducj i paronâts dal diaul, parceche Diu al ere cun lui.
Peraule di Diu. Ringrassiin Diu.

Aleluia Cf. Mc. 9, 6

Aleluia. I cî si son vierzûts e a jè vignude-fur la vôs dal Pari:
"Chest al è il gno Fi predilet: scoltàilu". Aleluia.

Vanseli
Cuant ch'al è stât batiât Gjesù, intant ch’al preave il cil si è vierzût.

Dal Vanseli seont Luche 3, 15-16. 21-22
Alore, sicome dut il popul al jere in spiete e si domandave tal so cjâf se Zuan nol ves vût di jessi il Crist, Zuan al cjape la peraule e al dîs a ducj: "Jo us batii cu l’aghe, ma al sta rivant ùn plui fuart di me, che jo no soi bon nancje di dispeâj la coree dai siei sandui: lui us batiarà tal Spirtu Sant e tal fuc".
Al sucêt che batiade dute la int e Gjesù, batiât ancje Lui, al preave; si vierç il cîl, e rive une vôs: Tù tu sês il gno Fi cjar, o soi content di te.
Vanseli dal Signor. La Laut a ti, o Crist!

Su lis ufiertis

Signor, acete i regai ch’o ti presentin pe Pifanie dal to Fi che tu j uelis ben, par che lis ufiertis dai tiei fedei a deventin il sacrifici di chel ch’al à vût il cûr di para-jú i pecjâts dal mont.
Lui al vîf e al regne pai secui dai secui. Amen.

Prefassi
Al è just, al va ben e al conven, ringrassiati te, simpri e dapardut, Signor, Pari, Diu onipotent eterno.
Cuant ch’al è stat batiât Crist tal Gjordan, tu as fat segnos ch’a pandevin il misteri dal gnûf batîsin.
Tu âs fat vignî-jú dal cîl la to vôs par che il mont al crodès che il to Verbo al ere cun nô; midiant dal Spirt che si è poiât su di Lui tan’che une colombe, tu âs consacrât il to servidor predi, profete e rè par che i umign a crodessin ch’al ere il Messie, mandât a predicjâ il Vanseli ai puars.
Parchel nô, dutune cu lis schiriis dal cîl, ti laudìn cence mai fermâ:

Antifone di Cumunion Zuan 1, 32. 34

Velu chì chel ch’al diseve Zuan: Jo lu ài viodût
e o ài testemoneât che lui al è Fi di Diu.

Dopo de Cumunion

Passûts di chest regal, Signor, a schene plete o preìn il to boncûr di jessi clamâts pardabon tiei fîs, parceche o scoltìn cun fede il to Fi unic.
Tal domandin par Crist nestri Signor. Amen.